in hi kaa naam mohabbat in hi kaa naam junun — Shaukat Thanvi

dhokaa thaa nigaahon kaa magar khuub thaa dhokaa
mujh ko tiri nazron mein mohabbat nazar aai

hamesha ghair ki izzat tiri mahfil mein hoti hai
tire kuche mein jaa kar ham zalil-o-khvaar hote hain

ham ne ye maanaa ki paidaa ho gayaa khaaegaa kyaa
ghar mein daane hi na paaegaa to bhunvaaegaa kyaa

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

ye peD hai kisi ki mohabbat ki yaadgaar
ai aandhiyo ye tum se giraayaa na jaaegaa

us maraz ko maraz-e-ishq kahaa karte hain
na davaa hoti hai jis ki na duaa hoti hai

kaafir-e-ishq huaa jab se main is dahr mein huun
hai mire kufr se ye diin aur imaan naazaan

dekh kar mujh ko tujhe kyuun hai tahayyur naaseh
mashrab-e-ishq hai ye mazhab-e-islaam nahin