main akelaa rah gayaa to main ne kuchh rishte banaae — Shoaib Kiani

marte rahnaa miraa har roz yuun thoDaa thoDaa
qatl hai jis ko main saabit nahin kar paaungaa

ham numu paate rahe hain apni himmat se ‘sho’aib’
pattharon mein ugne vaale aur kitne sabz hon

kuchh masala to tere jahaan mein zarur hai
jaan lag gai hamaari magar ji lagaa nahin

un se khudaa ko chhin ke badle mein kuchh to do
vo jin ke paas kuchh bhi khudaa ke sivaa nahin

ulTaa mujh ko hi uThaa leinge uThaane vaale
laapata pyaaron ke baare mein agar puchhungaa

ham jurm-e-mohabbat ki sazaa paaeinge tanhaa
jo tujh se hui ho vo khataa saath liye jaa

ab to saaf suntaa huun apne dil ki har dhaDkan
aur kyaa dikhaaegi ye tavil tanhaai

jaagtaa huun main ek akelaa duniyaa soti hai
kitni vahshat hijr ki lambi raat mein hoti hai

aks-e-yaad-e-yaar ko dhundlaa kiyaa hai
main ne khud ko jaan kar tanhaa kiyaa hai

shaayad log isi raunaq ko garmi-e-mahfil kahte hain
khud hi aag lagaa dete hain ham apni tanhaai ko

ik safina hai tiri yaad agar
ik samundar hai miri tanhaai