nasha kar lein nashe kaaTein manaaein hijr yaadon kaa — Shubham Shab

ye aakhir hai ye aakhir hai ye aakhir hai ye aakhir
us ke har ik zulm ko main ne aakhir samjhaa bhuul hui

mohabbat ye nahin kahti ki us ko baandh kar rakh lein
kisi panchhi ko uDtaa dekh kar jalte nahin hain ham

mujhe nafrat thi jis kirdaar se ab tak kahaani mein
usi kirdaar ke marne pe ab rone lagaa huun main

maan khush hai ki aakhir bachche siikh gae hain khush rahnaa
bachche khush hain siikh gae hain dard chhupaanaa achchhe se

main vo to bhuul baiThaa huun jo mujh ko yaad rakhnaa thaa
magar jo bhuul jaanaa thaa mujhe vo yaad hai ab tak

hamaari naav ki qismat mein shaayad
kisi buDhe shajar ki bad-du'aa hai

mere khvaabon ke jharokon ko sajaate rahiye
na sahi vasl magar yaad to aate rahiye

sab ko ham bhuul gae josh-e-junun mein lekin
ik tiri yaad thi aisi jo bhulaai na gai

jise ab tak talaash kartaa huun
gum-shuda ek yaad hai mujh mein

rahtaa nahin huun bojh kisi par ziyaada der
kuchh qarz thaa agar to adaa bhi huaa huun main

ahl-e-vafaa se tark-e-taalluq kar lo par ik baat kahein
kal tum in ko yaad karoge kal tum inhein pukaaroge

maqaam-e-shauq tire qudsiyon ke bas kaa nahin
unhin kaa kaam hai ye jin ke hausle hain ziyaad