nazar bhar ke jo dekh sakte hain tujh ko — Tajwar Najibabadi

aah us ki be-kasi tu na jis ke saath ho
haae us ki bandagi jis kaa tu khudaa nahin

bardaasht dard-e-ishq ki dushvaar ho gai
ab zindagi bhi jaan kaa aazaar ho gai

uf vo nazar ki sab ke liye dil-navaaz hai
meri taraf uThi to talvaar ho gai

khudaa mujh ko tujh se hi mahrum kar de
jo kuchh aur tere sivaa chaahtaa huun

kahin rusvaa na hon ranginiyaan dard-e-mohabbat ki
miraa itnaa khayaal ai dida-e-khun-baar kar lenaa

dil ke pardon mein chhupaayaa hai tire ishq kaa raaz
khalvat-e-dil mein bhi pardaa nazar aataa hai mujhe

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

gulaabon ke honTon pe lab rakh rahaa huun
use der tak sochnaa chaahtaa huun

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

pyaar aankhon se chhalaktaa hi hai
dil ke paimaane mein saaraa na rahe

mire andar miraa kuchh bhi nahin bas tu hai baaqi
tire andar bataa pyaare main ab kitnaa bachaa huun