nishaan-e-manzil-e-jaanaan mile mile na mile — Wahshat Raza Ali Kalkatvi

zaalim ki to aadat hai sataataa hi rahegaa
apni bhi tabiat hai bahalti hi rahegi

kis tarah husn-e-zabaan ki ho taraqqi 'vahshat'
main agar khidmat-e-urdu-e-muallaa na karun

abhi hote agar duniyaa mein 'daagh'-e-dehlavi zinda
to vo sab ko bataa dete hai 'vahshat' ki zabaan kaisi

qadrdaani ki kaifiyat maalum
aib kyaa hai agar hunar na huaa

dil ko ham kab tak bachaae rakhte har aaseb se
Thes aakhir lag gai shishe mein baal aa hi gayaa

thaa qafas kaa khayaal daaman-gir
uD sake ham na baal o par le kar

kyon tasavvur mein ji rahaa huun main
jab haqiqat mein mar hi jaanaa hai

apni anaa ki aaj bhi taskin ham ne ki
ji bhar ke us ke husn ki tauhin ham ne ki

vo kuchh muskuraanaa vo kuchh jheinp jaanaa
javaani adaaein sikhaati hain kyaa kyaa

munh chhupaanaa thaa tumhein pahle hi roz
ab kiyaa parda to kyaa parda kiyaa

taalluq jo bhi rakkho soch lenaa
ki ham rishta nibhaanaa jaante hain

khudi ki raushni mein main ne dekhaa hai aqidat ko
khudaai varna aazar ki miri Thokar pe rakkhi thi