ashk-baari se gham-o-dard ki kheti-baaDi — Waliullah Muhib

in do ke sivaa koi falak se na huaa paar
yaa tiir miri aah kaa yaa us ki nazar kaa

tum gaao apne raag ko us paas vaaizo
mushtaaq jo gadhaa ho tumhaare alaap kaa

kaabe mein vahi khud hai vahi dair mein hai aap
hindu kaho yaa us ko musalmaan vahi hai

khat kaa ye javaab aayaa ki qaasid gayaa ji se
sar ek taraf loTe hai aur ek taraf dhaD

barahman dair ko raahi huaa aur shaikh kaabe ko
nikal kar us doraahe se main ku-e-yaar mein aayaa

jab nashe mein ham ne kuchh miThe ki khvaahish us se ki
tursh ho bolaa ki kyuun be tu bhi is laaeq huaa

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

husn jalva dikhaa gayaa apnaa
ishq baiThaa rahaa udaas kahin

ye kah ke diyaa us ne dard-e-mohabbat
jahaan ham raheinge ye saamaan rahegaa

baham ik mukhtasar se dil mein hain shaadi o gham donon
ye chhoTaa saa makaan aur is mein dozakh bhi hai jannat bhi