tamaam din ki talab raah dekhti hogi — Waseem Barelvi

ham ye to nahin kahte ki ham tujh se baDe hain
lekin ye bahut hai ki tire saath khaDe hain

tahrir se varna miri kyaa ho nahin saktaa
ik tu hai jo lafzon mein adaa ho nahin saktaa

raat to vaqt ki paaband hai Dhal jaaegi
dekhnaa ye hai charaaghon kaa safar kitnaa hai

bhare makaan kaa bhi apnaa nasha hai kyaa jaane
sharaab-khaane mein raatein guzaarne vaalaa

shartein lagaai jaati nahin dosti ke saath
kiije mujhe qubul miri har kami ke saath

hamaare ghar kaa pataa puchhne se kyaa haasil
udaasiyon ki koi shahriyat nahin hoti

kyon tasavvur mein ji rahaa huun main
jab haqiqat mein mar hi jaanaa hai

apni anaa ki aaj bhi taskin ham ne ki
ji bhar ke us ke husn ki tauhin ham ne ki

vo kuchh muskuraanaa vo kuchh jheinp jaanaa
javaani adaaein sikhaati hain kyaa kyaa

na vaaiz hajv kar ek din duniyaa se jaanaa hai
are munh saaqi-e-kausar ko bhi aakhir dikhaanaa hai

miTaane vaale hamaaraa hi ghar miTaanaa thaa
chaman mein ek se ek achchhaa aashiyaanaa thaa

be-khudi kucha-e-jaanaan mein liye jaati hai
dekhiye kaun mujhe meri khabar detaa hai