ujaalaa apne gharaunde mein rah gayaa to raat — Zafar Imam

jivan kaa sangit achaanak antim sur ko chhu letaa hai
hanstaa hi rahtaa hai phir bhi mere andar marne vaalaa

ik nadi mein saikDon dariyaa ki tughyaani mili
Dubne vaale ko mar jaane ki aasaani mili

saaf jazbon ke havaale se to gham hain lekin
ek lamhe ki khushi ek sadi rahti hai

baat pahunche samaaat ko taasir de kis tarah
lafz hain aur lafzon mein zor-e-bayaani nahin

jald manzil tak pahunchne kaa junun us ko rahaa
zindagi bhar is liye rasta badaltaa rah gayaa

dekh lete hain andhere mein bhi rasta apnaa
shama ehsaas ke maanind jali rahti hai

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

shor din ko nahin sone detaa
shab ko sannaaTaa jagaa detaa hai

charaagh ki thartharaati lau mein har os qatre mein har kiran mein
tumhaari aankhein kahaan nahin thiin tumhaaraa chehra kahaan nahin thaa

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

raat ko raat kah diyaa main ne
sunte hi baukhlaa gai duniyaa