yahaan kisi ko bhi kuchh hasb-e-aarzu na milaa — Zafar Iqbal

baahar se chaTTaan ki tarah huun
andar ki fazaa mein tharthari hai

vo maqaamaat-e-muqaddas vo tire gumbad o qaus
aur miraa aise nishaanaat kaa zaaer honaa

mujh se chhuDvaae mire saare usuul us ne 'zafar'
kitnaa chaalaak thaa maaraa mujhe tanhaa kar ke

dar-e-umid se ho kar nikalne lagtaa huun
to yaas rauzan-e-zindaan se aankh maarti hai

aasmaan par koi tasvir banaataa huun 'zafar'
ki rahe ek taraf aur lage chaaron taraf

jaisi ab hai aisi haalat mein nahin rah saktaa
main hamesha to mohabbat mein nahin rah saktaa

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

ye mere saathi hain pyaare saathi magar inhein bhi nahin gavaaraa
main apni vahshat ke maqbare se nai tamannaa ke khvaab dekhun

hai ek umr se khvaahish ki duur jaa ke kahin
main khud ko ajnabi logon ke darmiyaan dekhun

tiraa visaal baDi chiiz hai magar ai dost
visaal ko miri duniyaa-e-aarzu na banaa

us ko fursat bhi nahin mujh ko tamannaa bhi nahin
phir khalish kyaa hai ki rah rah ke vafaa DhunDhti hai

phunkaa hai kis ne gosh-e-mohabbat mein ai khudaa
afsun-e-intizaar tamannaa kahein jise