koi pursaan nahin ghamon kaa 'zafar' — Zafar Iqbal Zafar

vo zabt thaa ki aah na nikli zabaan se
dil pe hamaare kitne hi khanjar guzar gae

aap dariyaa ki ravaani se na uljhein hargiz
tah mein us ke koi girdaab bhi ho saktaa hai

hamaari ziist mein aise bhi lamhe aate hain aksar
daraaron ke tavassut se havaa deti hain divaarein

tahzib hi baaqi hai na ab sharm-o-hayaa kuchh
kis darja ab insaan ye bebaak huaa hai

raabta kyuun rakhun main dariyaa se
pyaas bujhti hai meri sahraa se

us jaisaa dusraa na samaayaa nigaah mein
kitne hasin aankhon se paikar guzar gae

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

ham gham-zada hain laaein kahaan se khushi ke giit
deinge vahi jo paaeinge is zindagi se ham

un ke rukhsaar pe Dhalke hue aansu tauba
main ne shabnam ko bhi shoalon pe machalte dekhaa

un kaa gham un kaa tasavvur un ke shikve ab kahaan
ab to ye baatein bhi ai dil ho gaiin aai gai