aap dariyaa ki ravaani se na uljhein hargiz — Zafar Iqbal Zafar

vo zabt thaa ki aah na nikli zabaan se
dil pe hamaare kitne hi khanjar guzar gae

hamaari ziist mein aise bhi lamhe aate hain aksar
daraaron ke tavassut se havaa deti hain divaarein

tahzib hi baaqi hai na ab sharm-o-hayaa kuchh
kis darja ab insaan ye bebaak huaa hai

raabta kyuun rakhun main dariyaa se
pyaas bujhti hai meri sahraa se

ham log to marte rahe qiston mein hamesha
phir bhi hamein jiine kaa hunar kyuun nahin aayaa

us jaisaa dusraa na samaayaa nigaah mein
kitne hasin aankhon se paikar guzar gae

mujid jo nuur kaa hai vo meraa charaagh hai
parvaana huun main anjuman-e-kaaenaat kaa

musibat kaa pahaaD aakhir kisi din kaT hi jaaegaa
mujhe sar maar kar teshe se mar jaanaa nahin aataa

DhunD rahaa hai dariyaa kis ko
roz kinaare TuuT rahe hain

ek pardaa hai sirf saanson kaa
saans Thahre to kaaenaat khule

kah rahaa hai shor-e-dariyaa se samundar kaa sukut
jis kaa jitnaa zarf hai utnaa hi vo khaamosh hai

pairahan luuTe maze teri ham-aaghoshi ke
ham karein chaak garebaan khudaa ki qudarat