phaili hui hai chaandni ehsaas mein mire — Zafar Iqbal Zafar

vo zabt thaa ki aah na nikli zabaan se
dil pe hamaare kitne hi khanjar guzar gae

aap dariyaa ki ravaani se na uljhein hargiz
tah mein us ke koi girdaab bhi ho saktaa hai

hamaari ziist mein aise bhi lamhe aate hain aksar
daraaron ke tavassut se havaa deti hain divaarein

tahzib hi baaqi hai na ab sharm-o-hayaa kuchh
kis darja ab insaan ye bebaak huaa hai

raabta kyuun rakhun main dariyaa se
pyaas bujhti hai meri sahraa se

us jaisaa dusraa na samaayaa nigaah mein
kitne hasin aankhon se paikar guzar gae

vo chaand hai to aks bhi paani mein aaegaa
kirdaar khud ubhar ke kahaani mein aaegaa

sar-barahna bibiyon ke baal chaandi ho gae
kheme phir istaada kab honge ridaa kab aaegi

begam se kah rahaa thaa ye koi khalaa-navard
baiThi hui hai chaand pe ''guDiyaa'' mire liye

chaandi ke gharondon ki jab baat chali hogi
miTTi ke khilaunon se bahlaae gae honge

bhuuk chehron pe liye chaand se pyaare bachche
bechte phirte hain galiyon mein ghubaare bachche

baarish ke baa'd raat saDak aaina si thi
ik paanv paaniyon pe paDaa chaand hil gayaa