kisi ke honT par khili hansi ki main asiir huun — Zeba Khan Hina

rang badlaa huaa hai maujon kaa
kaun utraa thaa aaj paani mein

do roz se chhan-chhan pe badan naach rahaa hai
paanv se ajal ke koi paazeb utaare

ik baar jis ko dil se nikaalaa hai ham ne phir
us ko kisi bhi dil mein rasaai nahin mili

ghabraa gai huun yaar hujum-e-butaan se main
ab aahu-e-nigaah ko sahraa-e-hu dikhaa

us ki ujli peshaani se itni vahshat hoti hai
us se mil kar pahron khud ko taariki mein rakhti huun

us ki aankhon ne hatheli pe lahu chhiDkaa hai
tab kahin jaa ke chaDhaa rang-e-hinaai mujh par

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

nikal gayaa miri aankhon se misl-e-khvaa-o-khayaal
guzar gayaa dil-e-raushan se vo nazar ban kar

abhi aaghaaz-e-ulfat hai chalo ik kaam karte hain
bichhaD kar dekh lete hain bichhaD kar kaisaa lagtaa hai

hazaaron ghar hue hain is se viraan
rahe aabaad sarkaar-e-mohabbat

sunaa haal-e-dil-e-'majruh' shab ko
koi hasrat si hasrat thi bayaan mein