thoDi si baarish hoti hai — Ziaul Mustafa Turk

abr se aur dhuup se rishta hai ek saa miraa
aaine aur charaagh ke biich kaa faasla huun main

tire ghayaab ko maujud mein badalte hue
kabhi main khud ko tire naam se bulaataa huaa

samajh paayaa nahin par sun rahaa huun
vo sargoshi mein kyaa kyaa kah rahi hai

mere girya se na aazaar uThaane se huaa
faasla tai nai divaar uThaane se huaa

ham apne aap se bhi ham-sukhan na hote the
ki saari mushkilein aasaan mein paDi hui thiin

qatra qatra chhat se hi risne lagi
dhuup kaa rasta na thaa divaar mein

pyaaso raho na dasht mein baarish ke muntazir
maaro zamin pe paanv ki paani nikal paDe

aate nahin hain dida-giryaan ke saamne
baadal bhi karte hain miri barsaat kaa lihaaz

shahr ki galiyon mein gahri tirgi giryaan rahi
raat baadal is tarah aae ki main to Dar gayaa

pyaar hi pyaar hai sab log baraabar hain yahaan
mai-kade mein koi chhoTaa na baDaa jaam uThaa

baarish ki bahut tez havaa mein kahin mujh ko
darpesh thaa ik marhala jalne ki tarah kaa

'abr' duniyaa ko chhoD jaane kaa
ik bahaana talaash karnaa hai