dasht-o-dariyaa ki ibtidaa se hain — Zulfiqar Aadil

yuun uThe ik din ki logon ko huaa
abr kaa dhokaa hamaari khaak par

vaapas palaT rahe hain azal ki talaash mein
mansukh aap apnaa likhaa kar rahe hain ham

baiThe baiThe isi ghubaar ke saath
ab to uDnaa bhi aa gayaa hai mujhe

ye kis ne haat peshaani pe rakkhaa
hamaari niind puuri ho gai hai

ravaani mein nazar aataa hai jo bhi
use taslim kar lete hain paani

baiThe baiThe pheink diyaa hai aatish-daan mein kyaa kyaa kuchh
mausam itnaa sard nahin thaa jitni aag jalaa li hai

chaand hai paani mein yaa bhule hue chehre kaa aks
saahil-e-dariyaa pe dekho main bhi hairaani mein huun

mujid jo nuur kaa hai vo meraa charaagh hai
parvaana huun main anjuman-e-kaaenaat kaa

sab ummidein mire aashob-e-tamannaa tak thiin
bastiyaan ho gaiin gharqaab to dariyaa utraa

miri is chashm-e-tar se abr-e-baaraan ko hai kyaa nisbat
ki vo dariyaa kaa paani aur ye khun-e-dil hai barsaati

chaand bhi hairaan dariyaa bhi pareshaani mein hai
aks kis kaa hai ki itni raushni paani mein hai

husn-e-aaraasta qudrat kaa atiyya hai magar
kyaa miraa ishq-e-jigar-soz khudaa-daad nahin