yuun uThe ik din ki logon ko huaa — Zulfiqar Aadil

vaapas palaT rahe hain azal ki talaash mein
mansukh aap apnaa likhaa kar rahe hain ham

baiThe baiThe isi ghubaar ke saath
ab to uDnaa bhi aa gayaa hai mujhe

ye kis ne haat peshaani pe rakkhaa
hamaari niind puuri ho gai hai

ravaani mein nazar aataa hai jo bhi
use taslim kar lete hain paani

baiThe baiThe pheink diyaa hai aatish-daan mein kyaa kyaa kuchh
mausam itnaa sard nahin thaa jitni aag jalaa li hai

dasht-o-dariyaa ki ibtidaa se hain
ham vahi tiin din ke pyaase hain

yaar main itnaa bhukaa huun
dhokaa bhi khaa letaa huun

mere baa'd vafaa kaa dhokaa aur kisi se mat karnaa
gaali degi duniyaa tujh ko sar meraa jhuk jaaegaa

kuchh to majburiyaan rahi hongi
yuun koi bevafaa nahin hotaa

is qadar musalsal thiin shiddatein judaai ki
aaj pahli baar us se main ne bevafaai ki

ek parda saa hai fareb-e-nazar
ye bhi uTThe to dekhnaa kyaa hai

sab se baDaa fareb hai khud zindagi 'adaa'
is hila-ju ke saath hain ham bhi bahaana-saaz