na chhaanv karne ko hai vo aanchal na chain lene ko hain vo baanhein — Qateel Shifai

duur tak chhaae the baadal aur kahin saaya na thaa
is tarah barsaat kaa mausam kabhi aayaa na thaa

yuun barasti hain tasavvur mein puraani yaadein
jaise barsaat ki rim-jhim mein samaan hotaa hai

aakhri hichki tire zaanun pe aae
maut bhi main shaairaana chaahtaa huun

nikal kar dair-o-kaaba se agar miltaa na but-khaana
to Thukraae hue insaan khudaa jaane kahaan jaate

kyuun sharik-e-gham banaate ho kisi ko ai 'qatil'
apni suuli apne kaandhe par uThaao chup raho

apne haathon ki lakiron mein sajaa le mujh ko
main huun teraa tu nasib apnaa banaa le mujh ko

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

dimaagh un ke tajassus mein jism ghar mein rahaa
main apne ghar hi mein rahte hue safar mein rahaa

safar mein aise kai marhale bhi aate hain
har ek moD pe kuchh log chhuT jaate hain

yaad aai hai to phir TuuT ke yaad aai hai
koi guzri hui manzil koi bhuli hui dost

yaar bhi raah ki divaar samajhte hain mujhe
main samajhtaa thaa mire yaar samajhte hain mujhe