Shayari Of Obaidur Rahman

"naqāb chehre se mere haTā rahī hai ġhazal hisār-e-zāt se bāhar bulā rahī hai ġhazal ye kaun hai jo bahut be-qarār hai mujh meñ ye kis ke qurb meñ yuuñ kasmasā rahī hai ġhazal vo ḳhol jis meñ muqayyad huuñ TūTne ko hai mujhe bahār kā muzhda sunā rahī hai ġhazal vajūd kā huā jaatā hai falsafa paanī rumūz-e-zāt se parde uThā rahī hai ġhazal jo mo'tariz the hue vo bhī mo'tarif us ke har ek daur meñ jādū-numā rahī hai ġhazal sahā hai ḳhud pe har ik tiir tanz kā hañs kar piyā hai zahr magar muskurā rahī hai ġhazal hai qadr-dān ko apne ye vaj.h-e-sarshārī ye hāsidoñ ke diloñ ko jalā rahī hai ġhazal ki sirf gul hī nahīñ ḳhaar se bhī nisbat hai ye aur baat ki bād-e-sabā rahī hai ġhazal kare hai us pe riyāzat ki us kā husn khule 'obaid' ke liye misl-e-hinā rahī hai ġhazal thā ek shaġhl mirā merī ye ġhazal-goī 'obaid' zaat ko ab apnī bhā rahī hai ġhazal"

āñgan āñgan ḳhuun ke chhīñTe chehra chehra be-chehra
kis kis ghar kā zikr karūñ meñ kis kis ke sadmāt likhūñ

bachchoñ ko ham na ek khilaunā bhī de sake
ġham aur baḌh gayā hai jo tyauhār aa.e haiñ

jab dhuup sar pe thī to akelā thā meñ 'obaid'
ab chhāñv aa ga.ī hai to sab yaar aa.e haiñ

sohbat meñ jāhiloñ kī guzāre the chand roz
phir ye huā maiñ vāqif-e-ādāb ho gayā

shoḳhī kisī meñ hai na sharārat hai ab 'obaid'
bachche hamāre daur ke sanjīda ho ga.e

hameñ hijrat samajh meñ itnī aa.ī
parinda āb-o-dāna chāhtā hai

hameñ to ḳhvāb kā ik shahr āñkhoñ meñ basānā thā
aur is ke baa'd mar jaane kā sapnā dekh lenā thā

talāshe jā rahe haiñ ahd-e-rafta
zamīnoñ kī khudā.ī ho rahī hai

dikhāo sūrat-e-tāza bayān se pahle
kahānī aur hai kuchh dāstān se pahle

"manzileñ aur bhī haiñ vahm-o-gumāñ se aage ham ko karnā hai safar qaid-e-makāñ se aage paikar-e-sher ko malbūs atā kyā kiije jab taḳhayyul kī ho parvāz bayāñ se aage aab aur ḳhaak kī ye bazm hameñ kyā raas aatī ham ko jaanā thā sitāroñ ke jahāñ se aage kab talak dair-o-haram kī ye hadīs-e-be-sūd mas.ale aur haiñ nāqūs-o-azāñ se aage justujū aur hai kuchh ahl-e-junūñ kī varna kaun kartā hai safar jā-e-amāñ se aage karb ko apne tamāsha na banāyā jaa.e hai adab-gāh-e-vafā āh-o-fuġhāñ se aage nazr-e-andesha na ho jaa.e kahīñ ziist 'obaid' baat kuchh aur kareñ sūd-o-ziyāñ se aage"

"shu.ūr tak abhī un kī kahāñ rasā.ī hai abhī to kitne ḳhudāoñ kī vaañ ḳhudā.ī hai gumān-e-tīrgī raḳhshandagī pe hone lagā dayār-e-shab ne ajab dāstāñ sunā.ī hai ab is pe duur nikal aa.e to ḳhafā kyuuñ ho ye raah bhī to tumhī ne hameñ dikhā.ī hai kabhī jo mujh se mile vo rahe ḳhamosh magar pas-e-sukūt-e-zabāñ ḳhuub ham-navā.ī hai har ek fikr kī tah meñ ho jazba-e-ḳhālis bahut hī saḳht taqāzā-e-pārsā.ī hai bahut hī ḳhuub ki dariyā ke paas rahte ho kaho ki pyaas bhī apnī kabhī bujhā.ī hai jo ḳhud hī jāda-o-manzil se nā-balad hai 'obaid' ajiib baat yahāñ us kī rahnumā.ī hai"