hamein hijrat samajh mein itni aai — Obaidur Rahman

bachchon ko ham na ek khilaunaa bhi de sake
gham aur baDh gayaa hai jo tyauhaar aae hain

nazar mein duur talak rahguzar zaruri hai
kisi bhi samt ho lekin safar zaruri hai

taamir-o-taraqqi vaale hain kahiye bhi to un ko kyaa kahiye
jo shish-mahal mein baiThe hue mazdur ki baatein karte hain

apni hi zaat ke mahbas mein samaane se uThaa
dard ehsaas kaa siine mein dabaane se uThaa

jab dhuup sar pe thi to akelaa thaa mein 'obaid'
ab chhaanv aa gai hai to sab yaar aae hain

aangan aangan khuun ke chhinTe chehra chehra be-chehra
kis kis ghar kaa zikr karun mein kis kis ke sadmaat likhun

kuchh aur vus'atein darkaar hain mohabbat ko
visaal-o-hijr pe daar-o-madaar mushkil hai

zindagi phaili hui thi shaam-e-hijraan ki tarah
kis ko itnaa hausla thaa kaun ji kar dekhtaa

kaisaa firaaq kaisi judaai kahaan kaa hijr
vo jaaegaa agar to khayaalon mein aaegaa

aisi hi intizaar mein lazzat agar na ho
to do ghaDi firaaq mein apni basar na ho

ab to sanvaarne ke liye hijr bhi nahin
saaraa vabaal le ke ghazal kar diyaa gayaa

dard ko gurda taDapne ko jigar
hijr mein sab hain magar dil to nahin