shokhi kisi mein hai na sharaarat hai ab 'obaid' — Obaidur Rahman

koi dimaagh se koi sharir se haaraa
mein apne haath ki andhi lakir se haaraa

mere jazbaat aansuon vaale
sher sab hichkiyon se likhtaa huun

bachchon ko ham na ek khilaunaa bhi de sake
gham aur baDh gayaa hai jo tyauhaar aae hain

hamein hijrat samajh mein itni aai
parinda aab-o-daana chaahtaa hai

nazar mein duur talak rahguzar zaruri hai
kisi bhi samt ho lekin safar zaruri hai

aangan aangan khuun ke chhinTe chehra chehra be-chehra
kis kis ghar kaa zikr karun mein kis kis ke sadmaat likhun

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

gham hai na ab khushi hai na ummid hai na yaas
sab se najaat paae zamaane guzar gae

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

pyaaso raho na dasht mein baarish ke muntazir
maaro zamin pe paanv ki paani nikal paDe