Tasneem Abidi

ham ko khud men qiyam karna tha
varna raste paDe the qadmon men

shahr-ashob men kirdar na.e hain lekin
ye kahani hamen pahle bhi suna.i ga.i hai

is baar madine men hi dar aaya tha kuufa
is baar kiya ham ne safar aur tarah ka

sub.h be-nur hai shaam be-kaif hai kaisi halat men hai mubtala zindagi
roz-o-shab men kahan lutf baaqi raha aise jiine men kya hai maza zindagi

dasht-e-dil men kabhi ik naqa-savar aaya tha
aaj tak mujh men bahut gard uDa karti hai

khuda ke naam pe jis tarah log mar rahe hain
dua karo ki akela khuda na rah jaa.e

sab chale jaaeinge ik be-naam manzil ki taraf
ghar ki takhti ki jagah katbe lage rah jaaeinge

is baar huaa kun kaa asar aur tarah kaa
is baar hai imkaan-e-bashar aur tarah kaa

ik azaan aur namaaz kaa vaqfa
zindagi kitni mukhtasar paai

jhiil mein bas ek kankar pheink kar
daaere ki guunj main sunti rahi

hai tamaashe kaa ikhtitaam yahi
jab tamaashaa bane tamaashaai

hamaare she'r naghme aur sajde
adaa jo ho na paae kyaa hue vo