sab chale jaaeinge ik be-naam manzil ki taraf — Tasneem Abidi

is baar huaa kun kaa asar aur tarah kaa
is baar hai imkaan-e-bashar aur tarah kaa

ik azaan aur namaaz kaa vaqfa
zindagi kitni mukhtasar paai

jhiil mein bas ek kankar pheink kar
daaere ki guunj main sunti rahi

hai tamaashe kaa ikhtitaam yahi
jab tamaashaa bane tamaashaai

jangon mein thi main maal-e-ghanimat ke taur pe
mere liye kabhi mujhe baanTaa nahin gayaa

hamaare she'r naghme aur sajde
adaa jo ho na paae kyaa hue vo

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

safar mein aise kai marhale bhi aate hain
har ek moD pe kuchh log chhuT jaate hain

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

yuun to maujud apne ghar mein hai
aadmi mustaqil safar mein hai

ravaan hai umr aur insaan ghaafil
musaafir hai ki sotaa jaa rahaa hai

bichhaD kar kaarvaan se mein kabhi tanhaa nahin rahtaa
rafiq-e-raah ban jaati hai gard-e-kaarvaan meri