Top Love Shayari

ishq ne 'ghaalib' nikammaa kar diyaa
varna ham bhi aadmi the kaam ke

ishq se tabiat ne ziist kaa mazaa paayaa
dard ki davaa paai dard-e-be-davaa paayaa

vo aashiqi ke khet mein saabit qadam huaa
jo koi zakhm-e-ishq liyaa dil ki Dhaal par

jab siin laayaa ishq ne fauj-e-junun
aql ke lashkar mein bhaagaa bhaag hai

sau sau umidein bandhti hai ik ik nigaah par
mujh ko na aise pyaar se dekhaa kare koi

sitaaron se aage jahaan aur bhi hain
abhi ishq ke imtihaan aur bhi hain

bulbul ke kaarobaar pe hain khanda-haa-e-gul
kahte hain jis ko ishq khalal hai dimaagh kaa

kufr-o-imaan do nadi hain ishq kiin
aakhirash dono kaa sangam hovegaa

ai nasim-e-sahari bu-e-mohabbat le aa
turra-e-yaar sati itr ki mahkaar kuun khol

ishq tiri intihaa ishq miri intihaa
tu bhi abhi naa-tamaam main bhi abhi naa-tamaam

uThaa sakte nahin jab chuum kar hi chhoDnaa achchhaa
mohabbat kaa ye patthar is dafa bhaari ziyaada hai

saraapaa rehn-e-ishq-o-naa-guzir-e-ulfat-e-hasti
ibaadat barq ki kartaa huun aur afsos haasil kaa

hamaaraa 'mir'-ji se muttafiq honaa hai naa-mumkin
uThaanaa hai jo patthar ishq kaa to halkaa bhaari kyaa

kamaal-e-ishq bhi khaali nahin tamannaa se
jo hai ik aah to us ko bhi hai asar ki talab

phunkaa hai kis ne gosh-e-mohabbat mein ai khudaa
afsun-e-intizaar tamannaa kahein jise

dil mein na ho jurat to mohabbat nahin milti
khairaat mein itni baDi daulat nahin milti

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

e'tibaar-e-ishq ki khaana-kharaabi dekhnaa
ghair ne ki aah lekin vo khafaa mujh par huaa

us bevafaa ne ham ko agar apne ishq mein
rusvaa kiyaa kharaab kiyaa phir kisi ko kyaa

jaisi ab hai aisi haalat mein nahin rah saktaa
main hamesha to mohabbat mein nahin rah saktaa

hamaaraa ishq ravaan hai rukaavaTon mein 'zafar'
ye khvaab hai kisi divaar se nahin ruktaa

ishq kaa duur kare dil se jo dhaDkaa taaviz
is dhaDaake kaa koi ham ne na dekhaa taaviz

tum hi batlaao ki us ki qadr kyaa hogi tumhein
jo mohabbat muft mein mil jaae aasaani ke saath

aai hai tire ishq ki baazi dil-o-jaan par
is vaqt nazar kab hai mujhe sud-o-ziyaan par

maanaa jivan mein aurat ik baar mohabbat karti hai
lekin mujh ko ye to bataa de kyaa tu aurat zaat nahin