Ghazal

"vo ki zarron ki tarah mujh mein simaT kar phailaa jis ko baandhe hue rakkhaa vahi aksar phailaa ik umaDtaa huaa dariyaa mire aage pichhe ik sulagtaa huaa sahraa mire andar phailaa ek nuqte pe simaTti rahi duniyaa meri ek nuqta miri duniyaa se jo baahar phailaa parda-e-ruh se baahar bhi kisi din aauun aa kabhi apnaa badan mere badan par phailaa ye zamin bas mire qadmon se lagi rahti hai aasmaan meri nigaahon ke baraabar phailaa"

"ek hangaama bapaa hai arsa-e-aflaak par khaamushi phailaa rakhi hai aaj main ne khaak par ab miraa saaraa hunar miTTi mein mil jaane hai haath us ne rakh diye hain dida-e-namnaak par roz baDhti hi chali jaati hai binaai miri roz rakh detaa huun aankhon ko teri poshaak par"

"havaa se rishta miraa ustuvaar hote hue vo dekhtaa rahaa mujh ko ghubaar hote hue lagaa huun tajraba-e-zakhm mein so ab mire paas koi na aae miraa gham-gusaar hote hue nikal hi jaataa main zindaan-e-roz-o-shab se magar pakaD liyaa gayaa mujh ko faraar hote hue"

"zinda rahne ki aziyyat hi nahin hai kuchh kam aur marne kaa bhi andesha lagaa rahtaa hai ‘aks-dar-‘aks sabhi qaid hue jaate hain us ke darvaaze pe aaina lagaa rahtaa hai sirf ik tu hi nahin apne badan ke hamraah mere pichhe bhi koi saaya lagaa rahtaa hai jam' hote hain yahin par tire bikhre hue khvaab saahil-e-chashm pe ik mela lagaa rahtaa hai khatm hoti hi nahin hai miri aashufta-sari us gali mein miraa sarmaaya lagaa rahtaa hai"

"ye kyaa ki saare diye raat-bhar jalaa na karein in aandhiyon se kaho aur kuchh bahaana karein main apne dasht ko niklaa huun apni ruuh ke saath so shahr vaale miraa jism bhi ravaana karein mire lahu mein parinda jo par-fishaan hai bahut vo aaein aur kisi din ise nishaana karein ab aur kyaa karein khvaabon se bhaagne vaale yahi karein ki in aankhon kaa saamnaa na karein"

"khud apne vaaste kyaa kyaa sukhan banaate hain kisi ki zulf ko jab pur-shikan banaate hain ghazaal-e-shaam-o-sahar yunhi ram kiye jaaein ham apne siine ko dasht-e-khutan banaate hain usi ki khaak ke ham bhi bane hue hain miyaan ye chaak hai chalo us kaa badan banaate hain ye log bhaage hue hain tire visaal se kyaa jo tere hijr ko apnaa vatan banaate hain hamin pe paDti hain un aainon ki bauchhaarein to ham bhi un ke liye baankpan banaate hain tamaam 'umr ki aashuftagi-e-jaan ke 'evaz kisi ke lams ko apnaa kafan banaate hain"

"main to is baat pe tayyaar nahin ho saktaa tujh ko khone kaa ravaadaar nahin ho saktaa apne ghar hi mein dikhaanaa hai tamaashaa-e-junun khel ab ye sar-e-baazaar nahin ho saktaa kuchh to sochein ki na jaane kaa bahaana mil jaae vo bulaaegaa to inkaar nahin ho saktaa is kinaare se faqat dekhtaa rahtaa huun use jaantaa huun ki main us paar nahin ho saktaa"

"us ki mahfil se pare baiThe hain ham udaasi se bhare baiThe hain sirf ik lams ki zinda ho jaaein jaane ham kab se mare baiThe hain kuchh bhi ab yaad nahin apne sivaa sab ko bhule-bisare baiThe hain 'ishq mein kaam hain baaqi aur ham haath par haath dhare baiThe hain"

"raat aankhon ke darichon mein sajaa di gai hai ki mujhe jaagte rahne ki sazaa di gai hai ek surat thi mire 'ishq kaa sarmaaya-e-kul aur vo shakl thi teri so bhulaa di gai hai ab kahaan jaaun main khvaabon ki parastish karne mere andar koi masjid thi jo Dhaa di gai hai mujh mein hi lauT ke aane lage vahshat ke ghazaal kyaa mire dasht mein divaar uThaa di gai hai sab jahaanon ko sameTaa gayaa meri khaatir ban gayaa main to miri khaak uDaa di gai hai"

"hijr-o-visaal kitnaa aasaan kar diyaa hai is 'ishq ne mukammal saamaan kar diyaa hai palkon pe jo zaraa si bundein chamak rahi thiin daaman baDhaa ke us ne tufaan kar diyaa hai kuchh to hamein bhi us ne insaaniyat sikhaa di ham ne bhi us ko thoDaa shaitaan kar diyaa hai kaisi 'ajib chhab thi kyaa husn kaa samaan thaa us ne to aaj sab ko hairaan kar diyaa hai"

"is tarah mat apni tanhaai ko zaae' kijiye apne 'aashiq ko zaraa ghar par bulaayaa kijiye chhu ke kar diije hamein ghaaeb jahaan-e-khaak se jo haqiqat hai use ik din kinaaya kijiye qatl kiije shauq se ham ko sar-e-baazaar aap aur hamaari naa'sh galiyon mein phiraayaa kijiye aap ki dahliz par baiThaa huaa raahi huun main ik zaraa ghar se nikaliye aur saayaa kijiye lafz aur izhaar ke saare vasaail aap ke ab hamaare paas jo kuchh hai paraayaa kijiye aap ke aane se ham aate hain apne aap mein ik karam kiije hamaare paas aayaa kijiye dhuup ki shiddat mein saaraa husn kumhlaa jaaegaa kholiye zulfon ko aur chehre pe saayaa kijiye"

"kisi ke 'ishq mein ye kaam karnaa chaahte hain ham aasmaan pe ab paanv dharnaa chaahte hain simaTnaa chaahti hai raat meri aankhon mein sitaare mere badan mein utarnaa chaahte hain hamein to raas na aayaa ye intishaar apnaa zaraa sameT lein khud ko to marnaa chaahte hain nikal ke dekh zaraa hujra-e-taghaaful se tiri gali se musaafir guzarnaa chaahte hain jinhein kisi ki nigaahon ne baandh rakkhaa thaa ab us tilism ke lamhe bikharnaa chaahte hain bhaTak rahe hain in aankhon ke shahr mein kab se saraa-e-khvaab mein ik din Thaharnaa chaahte hain"

"ik ret kaa bagula mujh ko uchak rahaa thaa khud apni justuju thi so main bhaTak rahaa thaa kamre mein ik udaasi kaisi mahak rahi thi aankhon se ek aansu kaisaa chhalak rahaa thaa ye baar-e-jism aakhir main ne uThaa liyaa hai aazaa chaTakh rahe the aur main bhi thak rahaa thaa mujh mein kisi ki surat kyaa gul khilaa rahi thi baahar se hans rahaa thaa andar sisak rahaa thaa ye meri khaamushi bhi le jaaegi kahaan tak main aaj sirf us ki aavaaz tak rahaa thaa"

"khud ko ab koi tamaashaa nahin hone deinge ham tumhein shahr mein rusvaa nahin hone deinge jism ki ret par us ne jo lagaae hain nishaan mere naakhun inhein dhundlaa nahin hone deinge khvaahish-e-kaar-e-masihaai bahut hai lekin zakhm-e-dil ham tujhe achchhaa nahin hone deinge kuchh to qurbat bhi tiri raas nahin aaegi aur kuchh log bhi aisaa nahin hone deinge mujh ko maa'lum hai mujh mein na Thaharne vaale mere andar miraa honaa nahin hone deinge"

"hudud-e-shahr-e-tilismaat se nahin niklaa main apne daaera-e-zaat se nahin niklaa abhi to khud pe miraa ikhtiyaar baaqi hai abhi to kuchh bhi mire haath se nahin niklaa vo vaqt ban ke mire saamne rahaa har din tamaam-'umr main auqaat se nahin niklaa"

"daalaan mein kabhi kabhi chhat par khaDaa huun main saayon ke intizaar mein shab bhar khaDaa huun main kyaa ho gayaa ki baiTh gai khaak bhi miri kyaa baat hai ki apne hi uupar khaDaa huun main phailaa huaa hai saamne sahraa-e-be-kanaar aankhon mein apni le ke samundar khaDaa huun main sannaaTaa mere chaaron taraf hai bichhaa huaa bas dil ki dhaDkanon ko pakaD kar khaDaa huun main soyaa huaa hai mujh mein koi shakhs aaj raat lagtaa hai apne jism se baahar khaDaa huun main ik haath mein hai aaina-e-zaat-o-kaaenaat ik haath mein liye hue patthar khaDaa huun main"

"khud apni khvaahishein khaak-e-badan mein bone ko miraa vajud tarastaa hai mere hone ko ye dekhnaa hai ki baari miri kab aaegi khaDaa huun saahil-e-dariyaa pe lab bhigone ko abhi se kyaa rakhein aankhon pe saare din kaa hisaab abhi to raat paDi hai ye bojh Dhone ko na koi takiya-e-gham hai na koi chaadar-e-khvaab hamein ye kaun saa bistar milaa hai sone ko vo duur thaa to bahut hasratein thiin paane ki vo mil gayaa hai to ji chaahtaa hai khone ko"

"kanaar-e-aab tire pairahan badalne kaa miri nigaah mein manzar hai shaam Dhalne kaa ye kaisi aag hai mujh mein ki ek muddat se tamaasha dekh rahaa huun main apne jalne kaa sunaa hai ghar pe miraa muntazir nahin koi so ab ke baar main hargiz nahin sambhalne kaa khud apni zaat pe markuz ho gayaa huun main ki hausla hi nahin tere saath chalne kaa ab aa gae ho to phir umr bhar yahin Thahro badan se koi bhi rasta nahin nikalne kaa 'salim' sham-e-vajud aa gai hai bujhne par bas intizaar karo mom ke pighalne kaa"

"mire Thahraao ko kuchh aur bhi vusat di jaae ab mujhe khud se nikalne ki ijaazat di jaae maut se mil lein kisi gosha-e-tanhaai mein zindagi se jo kisi din hamein fursat di jaae be-khad-o-khaal saa ik chehraa liye phirtaa huun chaahtaa huun ki mujhe shakl-o-shabaahat di jaae bhare baazaar mein baiThaa huun liye jins-e-vajud shart ye hai ki miri khaak ki qimat di jaae bas ki duniyaa miri aankhon mein samaa jaaegi koi din aur mire khvaab ko mohlat di jaae"

"zehn ki qaid se aazaad kiyaa jaae use jis ko paanaa nahin kyaa yaad kiyaa jaae use tang hai ruuh ki khaatir jo ye viraana-e-jism tum kaho to adam-aabaad kiyaa jaae use zindagi ne jo kahin kaa nahin rakkhaa mujh ko ab mujhe zid hai ki barbaad kiyaa jaae use ye miraa sina-e-khaali chhalak uTThegaa abhi mere andar agar ijaad kiyaa jaae use vo gali puchhti hai dar-ba-dari ke ahvaal haan to phir vaaqif-e-rudaad kiyaa jaae use"

"zamin ke hote hue aasmaan ke hote hue kharaab-o-khvaar hue ham makaan ke hote hue vo be-ghari hai musallat ki mere shahr ke log panaah DhunDhte hain dasht-e-jaan ke hote hue saraab-e-jaan se hi sairaab ho gai miri pyaas qarib hi kisi aab-e-ravaan ke hote hue"

"baDaa maza ho jo ye mo'jiza bhi ho jaae vo sab kaa ho ke rahe aur miraa bhi ho jaae tamaam pichhlaa baras bevafaaiyon mein gayaa to khair ab ke baras kuchh vafaa bhi ho jaae vo ek but jo mire zehn ne taraashaa hai 'ajab nahin ki kisi din khudaa bhi ho jaae nahin hain yuun bhi bahut kam ye qurbaton ke 'azaab agar kaho to zaraa faasla bhi ho jaae is intizaar mein rahti hai khaamushi-e-hayaat ki shahr-e-dil mein koi haadisa bhi ho jaae"

"lag rahaa hai sanvar rahaa huun main ab jo itnaa bikhar rahaa huun main ab vo aavaargi nasib kahaan kyaa hi din the ki ghar rahaa huun main piiTh par ik zamin laade hue aasmaan se guzar rahaa huun main zindagi aur maut ke maabain ik khalaa hai jo bhar rahaa huun main apne ghar se kabhi nahin niklaa aur mahv-e-safar rahaa huun main"

"ishq ko kashf kiyaa husn kaa qaail huaa main aur phir apne liye kalma-e-baatil huaa main raas aati nahin ab mere lahu ko koi khaak aisaa is jism kaa paaband-e-salaasil huaa main saare asraar-e-fanaa khulte rahe subh talak raat aaina-e-hasti ke muqaabil huaa main aur phir meri khamoshi mein bhanvar paDne lage dam-e-rukhsat tiri aavaaz kaa saahil huaa main sahl kartaa rahaa jitnaa bhi mujhe meraa adam kaar-e-hasti ki tarah utnaa hi mushkil huaa main"