Ghazal

"kahte ho ab mire mazlum pe bedaad na ho sitam-ijaad ho phir kyuun sitam ijaad na ho nahin paimaan-e-vafaa tum ne nahin baandhaa thaa vo fasaana hi ghalat hai jo tumhein yaad na ho tum ne dil ko mire kuchh aisaa kiyaa hai naashaad shaad karnaa bhi jo ab chaaho to ye shaad na ho jo giraftaar tumhaaraa hai vahi hai aazaad jis ko aazaad karo tum kabhi aazaad na ho meraa maqsad ki vo khush hon miri khaamoshi se un ko andesha ki ye bhi koi fariyaad na ho main na bhulun gham-e-ishq kaa ehsaan 'vahshat' un ko paimaan-e-mohabbat jo nahin yaad na ho"

"kyaa hai ki aaj chalte ho katraa ke raah se dekho idhar nigaah milaa kar nigaah se sharm-e-jafaa se chhupte ho tum daad-khvaah se uzr-e-gunah tumhaaraa hai bad-tar gunaah se un ki hayaa o sharm ne rakkhi hai dil ki sharm kyaa hogaa jab nigaah milegi nigaah se insaaf bhi yahi hai yahi shaan-e-husn bhi haan haan nazar churaao qatil-e-nigaah se baitus-sanam se duur nahin hai haram ki raah kyuun raah puchhein zaahid-e-gum-karda-raah se kyuun shikva ham karein adam-e-iltifaat kaa vo puchhte to hain nigah-e-gaah-gaah se zaahid hazaar haif ki pahunchaa na koi faiz rindon ke mai-kade ko tiri khaanqaah se parvaanon kaa hujum hai shama-e-jamaal par jiitaa phiregaa kaun tiri jalva-gaah se shikva karun tumhaari jafaa kaa to ru-siyaah dekho na tum mujhe nigah-e-uzr-khvaah se khushhaali-e-raqib se vo shaad shaad hain yaani hain be-khabar mire haal-e-tabaah se gardan jhuki hui hai uThaate nahin hain sar Dar hai unhein nigaah laDegi nigaah se niklaa na koi haif yahaan qaabil-e-shikaar sayyaad khaali haath phiraa said-gaah se har chand 'vahshat' apni ghazal thi giri hui mahfil sukhan ki guunj uThi vaah vaah se"

"dard aa ke baDhaa do dil kaa tum ye kaam tumhein kyaa mushkil hai bimaar banaanaa aasaan hai har-chand mudaavaa mushkil hai ilzaam na deinge ham tum ko taskin mein koi ki na kami vaada to vafaa kaa tum ne kiyaa kyaa kijiye iifaa mushkil hai dil toD diyaa tum ne meraa ab joD chuke tum TuuTe ko vo kaam nihaayat aasaan thaa ye kaam balaa kaa mushkil hai aaghaaz se zaahir hotaa hai anjaam jo hone vaalaa hai andaaz-e-zamaana kahtaa hai puuri ho tamannaa mushkil hai mauquf karo ab fikr-e-sukhan 'vahshat' na karo ab zikr-e-sukhan jo kaam ki be-haasil Thahraa dil us mein lagaanaa mushkil hai"

"zabt ki koshish hai jaan-e-naa-tavaan mushkil mein hai kyuun ayaan ho aankh se vo gham jo pinhaan dil mein hai jis se chaaho puchh lo tum mere soz-e-dil kaa haal shama bhi mahfil mein hai parvaana bhi mahfil mein hai ishq-e-ghaarat-gar ne shah di husn-e-aafat-khez ko shauq-e-bismil hi se kas-bal baazu-e-qaatil mein hai kuchh samajh kar hi huaa huun mauj-e-dariyaa kaa harif varna main bhi jaantaa huun aafiyat saahil mein hai khud tujhe aa jaaegaa aashiq-navaazi kaa khayaal teraa rahrav kyuun khayaal-e-duri-e-manzil mein hai muddaaa-e-ishq meraa kuchh nahin juz zauq-e-ishq husn ko hairat ki ye kis sai-e-be-haasil mein hai apni shaan-e-be-niyaazi par tumhein kyaa kyaa hain naaz kaash tum us shauq ko jaano jo mere dil mein hai"

"jaan us ki adaaon par nikalti hi rahegi ye chheD jo chalti hai so chalti hi rahegi zaalim ki to aadat hai sataataa hi rahegaa apni bhi tabiat hai bahalti hi rahegi dil rashk-e-adu se hai sipand-e-sar-e-aatish ye shama tiri bazm mein jalti hi rahegi ghamza tiraa dhokaa yunhi detaa hi rahegaa talvaar tire kuche mein chalti hi rahegi ik aan mein vo kuchh hain to ik aan mein kuchh hain karvaT miri taqdir badalti hi rahegi andaaz mein shokhi mein sharaarat mein hayaa mein vaan ek na ik baat nikalti hi rahegi 'vahshat' ko rahaa uns jo yuun fann-e-sukhan se ye shaakh-e-hunar phulti-phalti hi rahegi"

"zamin roi hamaare haal par aur aasmaan royaa hamaari bekasi ko dekh kar saaraa jahaan royaa main jab niklaa chaman se shabnam aasaa gulistaan royaa udaasi chhaa gai aisi khud aakhir baaghbaan royaa na aayaa rahm kuchh bhi aah dil mein us sitamgar ke hamaari jabha-saai ke asar se aastaan royaa har ik 'uzv-e-badan maatam-kunaan hai dil ke jaane se huaa yusuf jo gum to kaarvaan kaa kaarvaan royaa khalal-afgan tiri bazm-e-tarab mein kaun ho zaalim huaa kyaa gar tire kuche mein koi tufta-e-jaan royaa mire aansu tiri bedaad kaa parda na kholeinge 'abas ye bad-gumaani hai main kab royaa kahaan royaa 'adu khush hon to hon ai be-muravvat teri mahfil mein miraa to haal ye hai jab kabhi aayaa yahaan royaa jafaa-e-dushmanaan aur bevafaai-haa-e-yaaraan se bahut gham-dida ho kar 'vahshat'-e-aazurda-jaan royaa"

"judaa kareinge na ham dil se hasrat-e-dil ko aziiz kyuun na rakhein zindagi ke haasil ko nihaan agarche hai mahfil se soz-e-dil meraa magar ye raaz hai maalum sham-e-mahfil ko vo tuul khinchaa balaa kaa tire taghaaful ne ki sabr aa hi gayaa mere muztarib dil ko kaThin hai kaam to himmat se kaam le ai dil bigaaD kaam na mushkil samajh ke mushkil ko vo kaam meraa nahin jis kaa nek ho anjaam vo raah meri nahin jo gai ho manzil ko khabar hui na unhein mere muztarib dil ki ghalat khayaal hai ye dil se raah hai dil ko balaa ki hoti hai 'vahshat' ki bhi ghazal-khvaani ki ik surur saa hotaa hai ahl-e-mahfil ko"

"tir-e-nazar ne zulm ko ehsaan banaa diyaa tarkib-e-dil ne dard ko darmaan banaa diyaa sad shukr aaj ho gai takmil ishq ki apne ko khaak-e-kucha-e-jaanaan banaa diyaa kotaahi koi dast-e-junun se nahin hui daaman ko ham-kanaar-e-girebaan banaa diyaa chhoDi hai jab se main ne salaamat-ravi ki chaal dushvaariyon ko raah ki aasaan banaa diyaa ai mishal-e-ummid ye ehsaan kam nahin taarik shab ko tu ne darakhshaan banaa diyaa husn-aafrin huaa hai tasavvur jamaal kaa dil ko havaa-e-gul ne gulistaan banaa diyaa zohd aur ittiqaa pe mujhe apne naaz thaa khud main ne tujh ko dushman-e-imaan banaa diyaa aaina-e-jamaal ko dekhungaa kis tarah us ne to pahle hi mujhe hairaan banaa diyaa vo imtiyaaz-e-husn hai maani o lafz kaa 'vahshat' ko jis ne 'ghaalib'-e-dauraan banaa diyaa"

"surur-afzaa hui aakhir sharaab aahista aahista huaa vo bazm-e-mai mein be-hijaab aahista aahista rukh-e-raushan se yuun uTThi naqaab aahista aahista ki jaise ho tulu-e-aaftaab aahista aahista kiyaa jab shauq ne us se khitaab aahista aahista hayaa ne bhi diyaa aakhir javaab aahista aahista vo masti-khez nazrein rafta rafta le uDiin mujh ko kiyaa kaashaana-e-dil ko kharaab aahista aahista baDhaa hangaama-e-shauq is qadar bazm-e-harifaan mein ki rukhsat ho gayaa us kaa hijaab aahista aahista kiyaa kaamil hamein ik umr mein soz-e-mohabbat ne hue ham aatish-e-gham se kabaab aahista aahista abas thaa zabt kaa daavaa sitam us ke sitam nikle nigaahein ho gaiin aakhir pur-aab aahista aahista dabistaan-e-vafaa mein umr bhar ki safha-gardaani samajh mein aai ulfat ki kitaab aahista aahista ba-qadr-e-shauq use taab-e-tapidan thi kahaan qaatil kiyaa bismil ne tere iztiraab aahista aahista balaa hain shaahidaan-e-shahr 'vahshat' mai-parasti mein huaa main un ki sohbat mein kharaab aahista aahista"

"shauq phir kucha-e-jaanaan kaa sataataa hai mujhe main kahaan jaataa huun koi liye jaataa hai mujhe jalva kis aaina-ru kaa hai nigaahon mein ki phir dil-e-hairat-zadaa aaina banaataa hai mujhe aashiqi sheva laDakpan se hai apnaa naaseh kyaa karun main ki yahi kaam kuchh aataa hai mujhe lutf kar lutf ki phir mujh ko na dekhegaa kabhi yaad rakh yaad ki tu dar se uThaataa hai mujhe 'vahshat' is misra-e-jurat ne mujhe mast kiyaa kuchh to bhaayaa hai ki ab kuchh nahin bhaataa hai mujhe"

"muravvat kaa paas aur vafaa kaa lihaaz kare aashnaa aashnaa kaa lihaaz dam-e-sajda sar sakht thaa be-adab kiyaa kuchh na us naqsh-e-paa kaa lihaaz na mahrum rakh mujh ko husn-e-qubul rahe kuchh to dast-e-duaa kaa lihaaz vo hain paas ab bas kar ai dard-e-dil kare kuchh maraz bhi davaa kaa lihaaz milaai na 'vahshat' kabhi us se aankh mujhe thaa jo us ki hayaa kaa lihaaz"

"dil ke kahne pe chalun aql kaa kahnaa na karun main isi soch mein huun kyaa karun aur kyaa na karun zindagi apni kisi tarah basar karnaa hai kyaa karun aah agar teri tamannaa na karun majlis-e-vaaz mein kyaa meri zarurat naaseh ghar mein baiThaa huaa shughl-e-mai-o-minaa na karun mast hai haal mein dil be-khabar-e-mustaqbil sochtaa huun use hushyaar karun yaa na karun kis tarah husn-e-zabaan ki ho taraqqi 'vahshat' main agar khidmat-e-urdu-e-muallaa na karun"

"aur ishrat ki tamannaa kyaa karein saamne tu ho tujhe dekhaa karein mahv ho jaaein tasavvur mein tire ham bhi apne qatre ko dariyaa karein ham ko hai har roz har vaqt intizaar banda-parvar gaah gaah aayaa karein chaaraagar kaa chaahiye karnaa ilaaj us ko bhi apnaa saa divaana karein un ke aane kaa bharosaa ho na ho raah ham un ki magar dekhaa karein ham nahin naa-vaaqif rasm-e-adab dil ki betaabi ko 'vahshat' kyaa karein"

"luuTaa mujhe us ki har adaa ne andaaz ne naaz ne hayaa ne donon ne kiyaa hai mujh ko rusvaa kuchh dard ne aur kuchh davaa ne bejaa hai tiri jafaa kaa shikva maaraa mujh ko miri vafaa ne poshida nahin tumhaari chaalein kuchh mujh se kahaa hai naqsh-e-paa ne kyuun jaur-kashaan-e-aasmaan se munh pher liyaa tiri jafaa ne dil ko maayus kar diyaa hai begaana mizaaj-aashnaa ne donon ne baDhaai raunaq-e-husn shokhi ne kabhi kabhi hayaa ne khush paate hain mujh ko dost 'vahshat' dil kaa ahvaal kaun jaane"