Ghazal

"gard jam jaae to shisha nahin dekhaa jaataa yaani tasvir ko dhundlaa nahin dekhaa jaataa tishnagi aa tujhe dariyaa ke havaale kar duun tujh ko is haal mein pyaasaa nahin dekhaa jaataa tum miraa naam-o-nasab puchh rahe ho sab se ishq ho jaae to shajara nahin dekhaa jaataa lauT aane ki tasalli tiri jhuTi hi sahi ab to muD-muD ke yuun rasta nahin dekhaa jaataa sher achchhe jo bure lagte hain duniyaa ko mire ho ghazal mein tiraa charchaa nahin dekhaa jaataa log milte hain bichhaDte hain magar kyon mujh se yuun tiraa chhoD ke jaanaa nahin dekhaa jaataa izz-o-tauqir kaa ye haal hasad mein ham se qad kisi kaa bhi ho unchaa nahin dekhaa jaataa"

"gulaab rangon ko zaa'fraani nahin karungaa main aise paudon ki baaghbaani nahin karungaa kisi ki khaatir ghalat-bayaani nahin karungaa main jhuTe logon ki tarjumaani nahin karungaa sunaa hai ab vo khilaaf mere gavaahi degaa jo kah rahaa thaa ki bad-gumaani nahin karungaa sazaa main khud ko kabhi na dungaa tire kiye ki jigar ko chhalni lahu ko paani nahin karungaa tumhaare gham kaa tumhaari yaadon kaa main amiin huun kahaa thaa tum se ki be-imaani nahin karungaa mu'aaf tujh ko main pahle bhi kar chukaa huun lekin dubaara tujh par ye mehrbaani nahin karungaa ye ghair-mumkin hai phir bhi haakim banaa to 'aadil' sitam-rasidon pe hukmraani nahin karungaa"

"kasak dil ki miTaane mein zaraa si der lagti hai kisi kaa gham bhulaane mein zaraa si der lagti hai kisi ko chaah kar apnaa banaanaa Thiik hai lekin mohabbat aazmaane mein zaraa si der lagti hai tumhein paane ki khvaahish mein huaa ehsaas ye mujh ko muqaddar aazmaane mein zaraa si der lagti hai jise minnat muraadon se baDi mushkil se paayaa ho use dil se bhulaane mein zaraa si der lagti hai ki jis dil ki zamin barson se banjar ho to phir us par nai chaahat ugaane mein zaraa si der lagti hai ghazal paDh kar to aasaani se mahfil luuT sakte ho magar izzat kamaane mein zaraa si der lagti hai dil-e-muztar ko aakhir kaun samjhaaegaa ai 'raahi' sukun-e-qalb paane mein zaraa si der lagti hai"

"jin logon se meri yaari hoti hai un mein koi baat to pyaari hoti duniyaa mein ik shakhs hi pyaaraa lagtaa hai ham aison mein ye bimaari hoti hai jab bhi apne yaaron se miltaa huun main jaane kyon bas baat tumhaari hoti hai sab ko dil kaa raaz bataanaa Thiik nahin duniyaa-daari duniyaa-daari hoti hai jhuuT bahut aasaan hai lekin ai 'raahi' sach kahne mein kuchh dushvaari hoti hai"

"use tum se mohabbat hai ghalat-fahmi mein mat rahnaa ye bas dil ki sharaarat hai ghalat-fahmi mein mat rahnaa tumhi ko dekh kar vo muskuraataa hai to hairat kyaa use hansne ki aadat hai ghalat-fahmi mein mat rahnaa hue barbaad to ab aah-o-zaari kar rahe ho tum kahaa bhi thaa siyaasat hai ghalat-fahmi mein mat rahnaa main tujh ko chaahtaa huun baat ye sach hai magar phir bhi mujhe teri zarurat hai ghalat-fahmi mein mat rahnaa hi jhuki nazron se taknaa aur khamoshi se guzar jaanaa mohabbat ki rivaayat hai ghalat-fahmi mein mat rahnaa kiyaa kartaa huun 'raahi' us ki taarifein sabab ye hai vo mujh se khubsurat hai ghalat-fahmi mein mat rahnaa"

"hijr kaa sog manaanaa kabhi dariyaa ronaa yaad kar ke tujhe hansnaa kabhi ronaa ronaa kyaa bataaun use kis baat pe hanste dekhaa kyaa bataaun mujhe kis baat pe aaya ronaa kaise bhulungaa vo bebaak adaaein us ki us ki baatein to vo hansnaa vo lipaTnaa ronaa baat auron ki nahin tu to miraa apnaa thaa kaash tujh ko nazar aataa mire dil kaa ronaa koi to baat use itnaa rulaati hogi achchhaa lagtaa hai kise TuuT ke tanhaa ronaa tum to khush the na mujhe chhoD ke jaate-jaate vaqt-e-rukhsat tumhein kis baat pe aaya ronaa muddaton baad ye ehsaas huaa hai 'raahi' muddaton baad phir aaya mujhe itnaa ronaa"

"tujhe yaad kar ke bhulaane se pahle main royaa bahut muskuraane se pahle ki ro-ro ke sonaa to hans-hans ke uThnaa ham aise na the dil lagaane se pahle mire khvaab rah jaaein na phir adhure jabin chuum lenaa jagaane se pahle tum apni tabaahi kaa maatam to kar lo mire haal pe muskuraane se pahle bahut yaad aaegi paagal si laDki ye sochaa nahin thaa bhulaane se pahle main TuuTaa main bikhraa huaa reza-reza miri jaan tire khat jalaane se pahle tumhein sirf ranj-o-alam hi mileinge zaraa soch lo dil lagaane se pahle ghazal pesh-e-khidmat hai 'raahi' ki sun lo kahaa us ne sab ko sunaane se pahle"

"jise ham kah sakein apnaa koi aisaa nahin miltaa tire hamnaam milte hain koi tujh saa nahin miltaa mohabbat ke safar mein hain musaafir ham musaafir tum hamein manzil nahin milti tumhein rasta nahin miltaa kisi ki rukhsati ke baad tanhaai ke aalam mein ghamon kaa saath hotaa hai koi tanhaa nahin miltaa samajh lenaa koi maqsad hai us ki chaaplusi mein jhukaa kar sar koi ikhlaas se itnaa nahin miltaa jidhar dekho udhar sach bolne vaale hi milte hain taajjub hai koi is daur mein jhuTaa nahin miltaa talab hai raushni ki to jalaao khud diyaa 'raahi' bujhaane tishnagi pyaase ki to dariyaa nahin miltaa"

"teri har baat pe tanqid nahin kar saktaa haan magar jhuuT ki taaid nahin kar saktaa tu agar jaan bhi maange to khushi se de duun main tire hukm ki tardid nahin kar saktaa aakhiri 'ishq kiyaa main ne magar pahli baar dusri baar ye tafrid nahin kar saktaa main ne dekhaa hai badaltaa huaa lahja teraa is liye tujh se to ummid nahin kar saktaa tu ne is haal mein chhoDaa hai ki allaah allaah 'iid kaa din hai magar 'iid nahin kar saktaa ye alag baat sukhanvar huun main 'aadil-raahi' dard itne hain ki tasvir nahin kar saktaa"

"hai asar is tarah dil par ishq ki taasir kaa aaj-kal hai haal jaisaa vaadi-e-kashmir kaa yuun to duniyaa kaa koi manzar mujhe bhaayaa nahin haan magar shaidaa huaa huun main tiri tasvir kaa hai miri duniyaa mein teri ahmiyat kuchh is tarah martaba hai shaaeri mein jis tarah se 'mir' kaa yaad tum aaoge mujh ko meri jaan ye jaan lo zikr jab bhi aaegaa meri ghazal mein hiir kaa main ne to bas ain likkhaa thaa lifaafe par magar jaane kyaa samjhaa hai matlab us ne is tahrir kaa tum se milnaa aur phir mil kar bichhaD jaane kaa gham faisla shaayad yahi hai kaatib-e-taqdir kaa sher main ne bhi sunaae khuub 'raahi' raat-bhar zikr chheDaa thaa kisi ne bazm mein jab 'mir' kaa"

"apni aankhon se tabaahi ye nazaara dekhun yaa'ni tujh ko main kisi aur kaa hotaa dekhun meri divaangi is moD pe le aai hai har kisi chehre mein bas ek hi chehra dekhun ye jo tasvir musavvir ne banaai varna chaand ko Thahre hue paani mein chaltaa dekhun tishnagi laakh sahi par ye nahin ho saktaa khud ko laachaar banaaun su-e-dariyaa dekhun ye tiri zid ki taDaptaa huaa dekhe mujh ko meri khvaahish ki hamesha tujhe hanstaa dekhun saamne tujh ko biThaaun tiraa maathaa chumun teri aankhein tiri zulfein tiraa chehra dekhun do qadam chal ke ye dil ne kahaa 'aadil-raahi' aakhiri baar palaT kar use jaataa dekhun"

"main na kahtaa thaa mire yaar badal jaataa hai vaqt kitnaa bhi ho dushvaar badal jaataa hai main ne bas dil ki suni varna tire baare mein log kahte the khabar-daar badal jaataa hai haakim-e-vaqt yuun maghrur na ban hosh mein aa piir aataa hai to itvaar badal jaataa hai tujh pe kaise ho yaqin mujh ko ki ab tu yaksar apnaa kahtaa to hai har baar badal jaataa hai ye nazaakat ye dikhaavaa ye takabbur achchhaa yaa'ni daulat se bhi me'yaar badal jaataa hai dekhne vaalo haqaarat se na dekho mujh ko bhuuk se jism kaa aakaar badal jaataa hai kyaa bataaun ki mohabbat ke safar mein 'raahi' gham to rah jaataa hai gham-khvaar badal jaataa hai"

"us ne ye faasla is vaaste rakkhaa hogaa paas aa kar mire baiThegaa to charchaa hogaa aaj phir us ne mujhe yaad kiyaa hai shaayad dil ne yunhi to nahin shor machaayaa hogaa dekhnaa log mohabbat ki misaalein deinge naam aaegaa miraa zikr tumhaaraa hogaa dard bechaini taDap ranj-o-alam tanhaai ham ne sochaa hi nahin itnaa khasaara hogaa jis ko din-raat duaaon mein hai maangaa ham ne vaqt aaegaa kisi din vo hamaaraa hogaa hijr is vaaste manzur kiyaa hai main ne teraa har zakhm mujhe dil se gavaaraa hogaa us ki bechaini bataati hai ki aadil 'raahi' bhulaa-bisraa hi koi yaad to aataa hogaa"