Ghazal

"isi futur mein karb-o-balaa se lipTe hue tamaam umr ganvaa di anaa se lipTe hue abhi bhi mil na saki in ki khaamushi ko zabaan ye log ab bhi hain saut-o-sadaa se lipTe hue havaa ke shahr mein bas saans lene aate hain vagarna ahl-e-zamin hain khalaa se lipTe hue har ek samt lagaa hai khamoshiyon kaa hujum ye kaun log hain koh-e-nidaa se lipTe hue hansi bhi aati hai in par taras bhi aataa hai ye nafraton ke pujaari khudaa se lipTe hue ham ibtidaa hi mein pahunche the intihaa ko kabhi ab intihaa mein bhi hain ibtidaa se lipTe hue main zindagi ke masaail se laDnaa chaahtaa huun magar vo haath nigaar-e-hinaa se lipTe hue vagarna khatm na hotaa gahan kabhi 'aazar' andhere khauf-zada the ziyaa se lipTe hue"

"hissa-e-dard viraasat se ziyaada hi milaa mujh ko shaayad miri qismat se ziyaada hi milaa gham zamaane kaa zaraa saa hi kharidaa thaa magar maal mujh ko miri qimat se ziyaada hi milaa vo siyaasat ne diye hon ki mohabbat ne tiri dil ko har zakhm zarurat se ziyaada hi milaa log jannat ke talabgaar hain lekin ai maan tu mili to mujhe jannat se ziyaada hi milaa laakh tadbir ne khushiyon ko manaayaa lekin ranj taqdir ko raahat se ziyaada hi milaa"

"paDaa thaa likhnaa mujhe khud hi marsiya meraa ki mere baad bhalaa aur kaun thaa meraa ajiib taur ki mujh ko sazaa sunaai gai badan ke neze pe sar rakh diyaa gayaa meraa yahi ki saans bhi lene na degi ab mujh ko ziyaada aur bigaaDegi kyaa havaa meraa main apni ruuh liye dar-ba-dar bhaTaktaa rahaa badan se duur mukammal vajud thaa meraa mire safar ko to sadiyaan guzar gaiin lekin falak pe ab bhi hai qaaem nishaan-e-paa meraa bas ek baar milaa thaa mujhe kahin 'aazar' banaa gayaa vo mujhi ko mujassama meraa"

"vo le rahaa thaa miraa imtihaan qiston mein khabar na thi ki nikaalegaa jaan qiston mein tamaam 'umr bhaTaktaa rahaa main khaana-ba-dosh kharid bhi na sakaa ik makaan qiston mein tamaam qarz adaa kar ke saahukaaron kaa bachaa hi lungaa buzurgon ki aan qiston mein ham ek saath har ik shai kharidte kyunkar ham aise log baDhaate hain shaan qiston mein basaa rahaa hai har ik fard ik alag hi jahaan bikhar rahaa hai har ik khaandaan qiston mein ham apne bachchon ko urdu se rakh ke naa-vaaqif miTaa rahe hain sunahri zabaan qiston mein"

"hazaaron khvaahishein rakhne ki majburi nahin hoti havas insaan ki lekin kabhi puuri nahin hoti hamaare jaise bhi qurbaan hue har ahd mein kitne anal-haq ki sadaa har baar mansuri nahin hoti ye kaise jurm ki paadaash hai ye zindagi jis se rihaai mil to jaati hai sazaa puuri nahin hoti masaail se ulajhnaa shaan mardon ki sahi lekin na ho gar tazkira teraa ghazal puuri nahin hoti"

"is tamaashe kaa sabab varna kahaan baaqi hai ab bhi kuchh log hain zinda ki jahaan baaqi hai ahl-e-sahraa bhi baDhe aate hain shahron ki taraf saans lene ko jahaan sirf dhuaan baaqi hai zindagi umr ke us moD pe pahunchi hai jahaan suud naapaid hai ehsaas-e-ziyaan baaqi hai DhunDhti rahti hai har lamha nigaah-e-dahshat aur kis shahr-e-mohabbat mein amaan baaqi hai main kabhi suud kaa qaail bhi nahin thaa lekin zindagi aur bataa kitnaa ziyaan baaqi hai maar kar bhi mire qaatil ko tasalli na hui main huaa khatm to kyuun naam-o-nishaan baaqi hai aisi khushiyaan to kitaabon mein mileingi shaayad khatm ab ghar kaa tasavvur hai makaan baaqi hai laakh 'aazar' rahein tajdid-e-ghazal se lipTe aaj bhi 'mir' kaa andaaz-e-bayaan baaqi hai"

"vus'at-e-sahraa ke aage aasmaan chhoTaa lagaa dhuup aisi thi ki sar ko saaebaan chhoTaa lagaa log khush-fahmi ke panjon par khaDe the fitratan aur yuun qad meraa un ke darmiyaan chhoTaa lagaa yaas mahrumi tazabzub karb khush-fahmi anaa itne saamaan the miraa tanhaa makaan chhoTaa lagaa ji rahaa hai vaa'da-e-fardaa pe tere ai khudaa varna is bande ko teraa ye jahaan chhoTaa lagaa ek ik lamhe kaa jab maangaa gayaa mujh se hisaab jaane kyon zehn-e-shahanshaah-e-zamaan chhoTaa lagaa duur se qatra bhi ik dariyaa nazar aayaa mujhe qurbaton ki zad mein bahr-e-bekaraan chhoTaa lagaa"

"subh hoti hai to daftar mein badal jaataa hai ye makaan raat ko phir ghar mein badal jaataa hai ab to har shahr hai ik shahr-e-tilismi ki jahaan jo bhi jaataa hai vo patthar mein badal jaataa hai ek lamha bhi Thahartaa nahin lamha koi pesh-e-manzar pas-e-manzar mein badal jaataa hai naqsh ubhartaa hai ummidon kaa falak par koi aur phir dhund ki chaadar mein badal jaataa hai band ho jaataa hai kuuze mein kabhi dariyaa bhi aur kabhi qatra samundar mein badal jaataa hai apne mafhum pe paDti nazar jab us ki lafz achaanak but-e-shashdar mein badal jaataa hai"

"suraagh bhi na mile ajnabi sadaa ke mujhe ye kaun chhup gayaa sahraaon mein bulaa ke mujhe main us ki baaton mein gham apnaa bhuul jaataa magar vo shakhs rone lagaa khud hansaa hansaa ke mujhe use yaqin ki main jaan de na paaungaa mujhe ye khauf ki roegaa aazmaa ke mujhe jo duur rah ke uDaataa rahaa mazaaq miraa qarib aayaa to royaa gale lagaa ke mujhe main apni qabr mein mahv-e-azaab thaa lekin zamaana khush huaa divaaron par sajaa ke mujhe yahaan kisi ko koi puchhtaa nahin 'aazar' kahaan pe laai hai andhi havaa uDaa ke mujhe"