Ghazal

"zamaana dekhtaa hai hans ke chashm-e-khun-fishaan meri magar main khush huun un ki daastaan hai aur zabaan meri akelaa huun bhari duniyaa mein main kis ko kahun apnaa koi hotaa to kar detaa mukammal daastaan meri guzartaa aa rahaa huun jaane mein kin kin maqaamon se zamin ke baad aayaa rahguzar mein aasmaan meri main yaarab khaak kaa putlaa sahi lekin ye kyaa kam hai hui hai muntakhab hasti baraae imtihaan meri fanaa ki manzilon par khatm hain raahein anaasir ki yahi ab dekhnaa hai ruuh jaati hai kahaan meri na jaane silsila jaataa kahaan tak jism-e-khaaki kaa khudaa kaa shukr hai had ban gae kaun-o-makaan meri zaraa ai azm-e-dil rukh pher tufaan ki havaaon ke su-e-girdaab kashti le chali mauj-e-ravaan meri zabaan par le to aaungaa magar dil thaamnaa hogaa mujhe maalum hai rudaad-e-dil hai laa-bayaan meri kaDak kar bijliyaan rah jaaeingi chhaT jaaeinge baadal rahegaa zindagi ban kar sukun-e-aashiyaan meri 'falak' main sar-zamin-e-'daagh'-o-'ghaalib' kaa huun ik zarra vatan hai shahr-e-dehli zindagi urdu zabaan meri"

"ashk-e-gham vo hai jo duniyaa ko dikhaa bhi na sakun aur gir jaae zamin par to uThaa bhi na sakun ye mire gham kaa fasaana hai rahegaa lab par teri rudaad nahin hai ki sunaa bhi na sakun partav-e-husn huun is vaaste mahdud huun main husn ho jaaun to duniyaa mein samaa bhi na sakun tez kuchh vaqt ki raftaar nahin hai lekin tum agar saath na do paanv baDhaa bhi na sakun ab vahi log bigaaDi hai jinhon ne qismat chaahte hain ki main taqdir banaa bhi na sakun aaj naakaam sahi kal kaa bharosa hai mujhe ishq phir kyaa jo tujhe apnaa banaa bhi na sakun dil kahaan ek siyah-khaana hai ranj-o-gham kaa is qadar daagh lage hain ki miTaa bhi na sakun dil ki gahraai se ai dost zaraa kah to sahi jaan aisi to nahin jis ko ganvaa bhi na sakun umr guzri kabhi saaqi ne 'falak' ye na kahaa itni pi le ki tujhe hosh mein laa bhi na sakun"

"meri hasti mein miri ziist mein shaamil honaa tujh ko ai husn mubaarak ho miraa dil honaa khushk ho jaaein jo aankhein to gham-e-furqat kyaa chaahiye aur bhi tar dida-e-bismil honaa us pe mushkil koi paD jaae to aasaan ho jaae hausla bakhshe jise kaam kaa mushkil honaa laa miraa jaam uThaa apni suraahi saaqi aaj hai gardish-e-dauraan ke muqaabil honaa ab kahe jaao fasaane miri gharqaabi ke mauj-e-tufaan ko mire haq mein thaa saahil honaa qais lailaa ki nazar se hi banaa thaa majnun us kaa achchhaa hai pas-parda-e-mahmil honaa mast ulfat hon miraa naam hai divaana-e-husn kaam hai hosh mein aanaa kabhi ghaafil honaa kitni ummid se baDhte hain musaafir ke qadam qudrati hai gham-e-naakaami-e-manzil honaa aaj ke daur mein kam baat nahin hai ye 'falak' ek fan mein kisi insaan kaa kaamil honaa"

"ku-e-jaanaan mein adaa dekhiye divaanon ki dhajjiyaan baanTte phirte hain garebaanon ki khaak uDti hai fazaa mein yunhi parvaanon ki kaun letaa hai khabar sokhta-saamaanon ki husn kyaa shai hai faqat zauq-e-nazar ki taskin ishq kyaa chiiz hai takhliq hai armaanon ki aap rukh sail-e-havaadis kaa badal detaa hai aasmaan dekh ke gardish mire paimaanon ki aks gulshan pe bahaaron kaa paDaa thaa lekin khinch gai phuul pe tasvir bayaabaanon ki aaj saahil pe pahunch kar hi rahegi kashti aaj Takkar hai mire azm se tufaanon ki hashr ke din vo khataa-varon pe rahmat hogi aankh khul jaaegi jannat ke nigahbaanon ki ibn-e-aadam ne 'falak' hosh sambhaalaa jis dam sab se pahle rakhi buniyaad sanam-khaanon ki"

"ku-e-jaanaan mein nahin koi guzar ki surat dil uDaa phirtaa hai TuuTe hue par ki surat ham to manzil ke talabgaar the lekin manzil aage baDhti hi gai raahguzar ki surat vo rahein saamne mere to tasalli varna dil bhi kambakht bhaTaktaa hai nazar ki surat ruuh afsurda pareshaan khayaalaat mein gum aisi pahle kabhi dekhi thi bashar ki surat meri qismat mein mohabbat ne yahi likkhaa hai dard bhi dil mein rahe zakhm-e-jigar ki surat baiTh jaaein kisi goshe mein simaT kar ai dost kaun gardish mein rahe shams-o-qamar ki surat vo gae ghar se to phir ham ne bhi ghar ko chhoDaa ham se dekhi gai divaar na dar ki surat chand aansu hi mire dil pe 'falak' gir jaaein aatish-e-gham se sulagtaa hai sharar ki surat"

"niyyat agar kharaab hui hai huzur ki gaDh lo koi kahaani hamaare qusur ki kyuun dil ki aag le na khabar duur duur ki kaundi hai har dimaagh mein bijli futur ki har zulm par kiyaa hai zamaane se ehtijaaj kuchh bhi na ban paDaa to mazammat zarur ki taamir kaa to vaqt hai takhrib kaa junun ab bhi hai aadmi ko zarurat shuur ki ai shaam-e-gham ki gahri khamoshi tujhe salaam kaanon mein ek aai hai aavaaz duur ki hosh uD gae to hosh haqiqat kaa aa gayaa muusaa ki be-hisi mein tajalli thi nuur ki kahtaa hai inqalaab zamaana jise 'falak' ik duniyaa muntazir hai usi ke zuhur ki"

"ho khudaa kaa karam iraadon par ji rahe hain kisi ke vaadon par zindagi ko banaa diyaa hai chaman phuul barsein tumhaari yaadon par asliyat kyaa hai ye khudaa jaane zinda ab tak hain etiqaadon par paas aa kar gurez karte ho zulm hai ye miri muraadon par chhin gae takht baadshaahon ke tang duniyaa hai shaah-zaadon par mil ke sab amn-o-chain se rahiye laantein bhejiye fasaadon par ai 'falak' naaz hai faqiri mein mujh ko bosida in libaadon par"

"saaqiyaa ye jo tujh ko ghere hain in mein kuchh rind kuchh luTere hain apni tahzib khaa rahi hai hamein saanp ke munh mein khud sapere hain jis ne bakhshe hain phuul gulshan ko us ne kuchh khaar bhi bikhere hain kal jo tufaan thaa samundar mein us ke ab saahilon pe Dere hain tere baare mein kuchh nahin maalum ham agar hain to sirf tere hain hosh-o-ghaflat mein paas hi maujud mujh ko vo har taraf se ghere hain tum se to kyaa nazar milaaeinge khud se bhi ham nigaah phere hain dar-haqiqat vahi adu hain 'falak' jin ko kahtaa hai tu ki mere hain"

"tu daur-e-nau ke taqaazon ko apne dhyaan mein rakh milaa hai 'ilm qadam apne aasmaan mein rakh sunaa hai chashm-e-muarrikh mein raushni kam hai sunahri harf bhi kuchh apni daastaan mein rakh yahaan se dusri duniyaa mein tujh ko jaanaa hai tu apni ruuh kaa phailaao do jahaan mein rakh kabhi bhi baat se apni phiraa nahin karte agar hai mard to kuchh pukhtagi zabaan mein rakh karam khudaa kaa kisi par yunhi nahin hotaa yaqin ke saath tu sajdon ko imtihaan mein rakh kisi ko tiir ke aage jigar to laane de na chhoD vaqt se pahle ise kamaan mein rakh na daagh daaman-e-qaatil pe aur bhi hon 'falak' shanaakht apne lahu ki kisi nishaan mein rakh"

"hayaat-bakhsh dil-e-mehrbaan nahin miltaa mujhe zamin pe koi aasmaan nahin miltaa hazaar hashr uThaate hain khaak ke putle phir ek roz kisi kaa nishaan nahin miltaa nayaa hai shahr kahaan jaa ke sar chhupaaungaa vo ajnabi huun jise ham-zabaan nahin miltaa ye vo hai gul jo khaTaktaa hai khaar ki surat vafaa-parast ko dushman kahaan nahin miltaa mazaa to jab thaa taDapti hi charkh par rahti kisi kaa ghar tujhe barq-e-tapaan nahin miltaa bas ek daaera hai jis mein ghumtaa huun main mire safine ko aab-e-ravaan nahin miltaa havaa ki tezi se hotaa hai larza-bar-andaam vo naakhudaa jise 'azm-e-javaan nahin miltaa kami bahaar ki hai aur na ghuncha-o-gul ki sukun phir bhi sar-e-gulsitaan nahin miltaa main khaar-o-khas ko haTaataa huun raaston se 'falak' luTaa huaa jo koi kaarvaan nahin miltaa"

"shokhi-o-naaz judaa rang judaa maange hai naazuki husn ki phulon ki adaa maange hai sochtaa huun ki milaa kyaa hai khudaa ke dar se saans lene ko bhi insaan havaa maange hai 'ahd-e-haazir mein vo bohtaat hai ranj-o-gham ki banda ghabraa ke koi aur khudaa maange hai ek sajde ko bhi tayyaar nahin dil meraa dar magar rahmat-e-yazdaan kaa khulaa maange hai dekh kis haal ko pahunchaa hai ye bimaar-e-alam chaaraagar munh ko take hai jo davaa maange hai bu-e-gul dekh kahin teri zarurat to nahin chheD kar zulf ko kuchh baad-e-sabaa maange hai ai falak khud ko sanbhaalun ki bachaaun kashti hosh kyaa jaan bhi miri mauj-e-balaa maange hai"

"aah-e-zindaan mein jo ki charkh pe aavaaz gai par gae par na miri khvaahish-e-parvaaz gai yaad itnaa hai mire lab pe fughaan aai thi phir khudaa jaane kahaan dil ki ye aavaaz gai main ne anjaam se pahle na palaT kar dekhaa duur tak saath mire manzil-e-aaghaaz gai maut jis raah mein ghabraa ke qadam rakhti thi zindagi apni vahaan bhi ba-sad andaaz gai par bhi baazu ke the mazbut azaaem pukhta phir bhi bekaar miri koshish-e-parvaaz gai dekhte dekhte khaamosh huaa naghma-e-dil taar jab TuuT gae saaz ki aavaaz gai ai 'falak' main jo gayaa su-e-falak shor huaa mahfil-e-dahr se ik hasti-e-mumtaaz gai"

"raushan hai fazaa shams koi hai na qamar hai shaair huun mujhe arsh-e-muallaa ki khabar hai dariyaa mein hain girdaab kinaare pe bagule aaraam ki surat na idhar hai na udhar hai patte ki khaDak se bhi laraztaa hai miraa dil saae se bhi khatra mujhe dauraan-e-safar hai ik mauj bhi rakhti hai kinaare ki tamannaa aavaara jo phirtaa huun ye meraa hi jigar hai ik taair-e-mahsur asiri kaa mukhaalif uD saktaa hai baazu mein agar ek bhi par hai maujon ko pata kyaa hai samundar ko khabar kyaa kis abr ki shokhi hai sadaf mein jo guhar hai kyaa ashk kisi TuTte taare pe bahaaun khud apnaa hi anjaam 'falak' pesh-e-nazar hai"

"rang-aamezi se paidaa kuchh asar aisaa huaa khud musavvir apni hi tasvir kaa shaidaa huaa kyaa nigaahon ki tashaffi ho ki bazm-e-dahr mein saamne aataa hai har manzar miraa dekhaa huaa khol kar aankhein zaraa ye husn-e-mahr-o-maah dekh diid ke qaabil hai zarra charkh par pahunchaa huaa ishq ne is dil ko dam lene ki fursat hi na di ek jab armaan niklaa dusraa paidaa huaa barq ke shoalon munaasib hai mujhi ko phunk do kis kaleje se main dekhun aashiyaan jaltaa huaa ik vahi apnaa khudaa hai ik vahi hai apnaa but jis ke dar par sar jhukaa dene se sar unchaa huaa pahuncho gar ik chaand par sau aur aate hain nazar aasmaan jaane hai kitni duur tak phailaa huaa ab 'falak' hai ik nai duniyaa ki dil ki justuju ye zamin dekhi hui hai aasmaan dekhaa huaa"

"kyaa kahein kyunkar huaa tufaan mein paidaa qafas mauj jab bal khaa ke uTThi ban gayaa dariyaa qafas zindagi gham kaa badal hai aarzuein yaas kaa aasmaan sayyaad ham qaidi hain aur duniyaa qafas dil ke haq mein siina zindaan aarzu ke haq mein dil saikDon dekhe hain lekin ye nayaa dekhaa qafas din asiri ke ba-har-surat guzaare jaaeinge ek qaidi ke liye hai kyaa buraa achchhaa qafas koi bhi divaar sadd-e-raah ho sakti nahin tol baiThe par to phir sayyaad kyaa kaisaa qafas apnaa ghar phir apnaa ghar hai apne ghar ki baat kyaa ghair ke gulshan se sau darja bhalaa apnaa qafas ai 'falak' aai yahaan bhi mujh ko yaad-e-aashiyaan barq tu gardun pe chamki jagmagaa uTThaa qafas"

"ye aur baat hai har shakhs ke gumaan mein nahin zamin kahaan hai jo aaghosh-e-aasmaan mein nahin ziyaa-faraaz jahaan hain hazaar maah-o-nujum charaagh koi magar mere aashiyaan mein nahin vafur-e-'ishq ki nairangiyaan are tauba jo dil mein dard hai vo dil ki daastaan mein nahin tum apnaa tir-e-adaa meri ruuh mein DhunDo in abruon ki lachakti hui kamaan mein nahin ye aur baat ki gulshan pe gir paDe bijli kami to koshish-e-tanzim-e-gulsitaan mein nahin jo apni sust-ravi kaa 'ilaaj kar na sake maqaam us kaa koi ahl-e-kaarvaan mein nahin rumuz-e-uqbaa se ahl-e-zamin hon kyaa vaaqif kisi bhi pahlu koi rabt do-jahaan mein nahin 'falak' main kaifiyyat-e-dil se khud pareshaan huun kisi fughaan mein asar hai kisi fughaan mein nahin"

"aaraasta bazm-e-aish hui ab rind piyeinge khul khul ke jhukti hai suraahi saaghar par naghme hain fazaa mein qulqul ke aa tujh ko banaa duun rashk-e-chaman mizaan-e-mohabbat mein tul ke aariz ko gulon ki raanaai bal zulf ko bakhshun sumbul ke gulshan mein bahaar aae ki khizaan murjhaae kali yaa phuul khilein sayyaad tujhe kyaa matlab hai tu ashk gine jaa bulbul ke ham ahl-e-chaman ki nazron mein kuchh aur hi maanaa rakhtaa hai kaliyon kaa chaTak kar khil jaanaa phulon kaa nikharnaa dhul dhul ke vo chain to shaayad rizvaan ko jannat mein kyaa miltaa hogaa jo mujh ko sukun mil jaataa hai saae mein kisi ki kaakul ke ushshaaq ke marne jiine ko itni hi lagaavaT kaafi hai ik choT si tirchhi nazron ke do chaar jhakole kaakul ke kaun us ki fazaaon mein aa kar takhrib ke shoale phunk gayaa aakhir ye vahi to gulshan hai rahte the jahaan ham mil-jul ke is daur ke paagal insaanon nafrat ki faraavaani kab tak gar aaj nahin to kal tum ko rahnaa hi paDegaa mil-jul ke gar had se sivaa pi loge 'falak' phir hosh kahaan mai-khaane kaa do-chaar hi qatre kaafi hain pichhe na paDho jaam-e-mul ke"

"taaron se maahtaab se aur kahkashaan se kyaa meraa vatan zamin hai mujhe aasmaan se kyaa TukDe jigar ke hon ki Tapaktaa ho khun-e-dil unvaan jo tum nahin to tumhein daastaan se kyaa jiinaa jo jaantaa ho taDap kar tire baghair is ko tiri gali se tire aastaan se kyaa un kaa na saamnaa ho usi mein hai aafiyat kyaa jaaniye ki nikle hamaari zabaan se kyaa utregaa jab khumaar vahi honge ranj-o-gham dil ko sukun milegaa mai-e-arghavaan se kyaa ai dil hai kis liye tujhe aavaargi kaa shauq tu bhi bichhaD gayaa hai kisi kaarvaan se kyaa gham hai shikast kaa na khushi fath ki 'falak' mujh ko amal se kaam hai sud-o-ziyaan se kyaa"