Ghazal

"dil ki shaakhon pe umidein kuchh hari baandhe hue dekhtaa huun tujh ko ab bhi TikTiki baandhe hue teri furqat mein paDe hain vaqt se munh phere ham muddatein guzri kalaai par ghaDi baandhe hue aaj tak puuraa na utraa tu mire ashaar mein mujh ko mere fan se hai meri kami baandhe hue"

"Dubte logon ki khaatir aas kaa tinkaa huun main shaairi gar kaam hai to kaam kaa banda huun main ek din sochaa rakhun khud ko zaraa tartib se aur phir sochaa ki ye kyaa kyaa sochtaa rahtaa huun main rafta rafta pahnungaa saare makhoTe sab kavach vaqt do ai shahr vaalo dasht se aayaa huun main"

"dil o nazar mein tire ruup ko basaataa huaa tiri gali se guzartaa huun jagmagaataa huaa ghazal ke phuul mire zehn mein mahakte hue tiraa khayaal mujhe raat bhar jagaataa huaa vo baargaah-e-adab hai aqidaton ki jagah main us gali se kyuun guzrungaa khaak uDaataa huaa mire junun se harifon ke paanv ukhaDte hue main jaan dene ke chakkar mein jaan bachaataa huaa kise milaa tire qadmon mein jaan de denaa main surkh-ru huaa chaahat ke kaam aataa huaa tumhaari yaad mujhe is tarah se lagti hai koi charaagh andhere mein jhilmilaataa huaa hatheliyon ki lakirein mujhe parakhti huiin main har qadam pe muqaddar ko aazmaataa huaa javaab kyuun hain sabhi khaamoshi mein dubke hue savaal zehn ke aangan mein aataa jaataa huaa mire khilaaf sabhi saazishein rachin jis ne vo ro rahaa hai miri daastaan sunaataa huaa hamaari samt lagaataar vaar hote hue use bachaane mein aksar main choT khaataa huaa"

"bujhe ho, haath maayusi lagi hai kyaa dar-e-ulfat pe ab kunDi lagi hai kyaa abhi bhi tujh dar-e-dil par bataa jaanaan hamaare naam ki takhti lagi hai kyaa samundar baukhalaayaa phir rahaa hai kyuun kinaare phir koi kashti lagi hai kyaa hamin tum se hamesha milne aaein kyuun tumhaare paanv mein mehndi lagi hai kyaa kaTe hain par to kaTne do miyaan socho iraadon par koi qainchi lagi hai kyaa jahaan kal ishq par charchaa huaa ghanTon vahin ab husn ki manDi lagi hai kyaa hain aankhein surkh lab zakhmi anaa ghaayal tire kirdaar ki boli lagi hai kyaa tiri galiyon se jo guzraa use jaanaan bhalaa duniyaa kabhi achchhi lagi hai kyaa yaqinan aaj be-parda vo nikle hain vagarna chaandni phiki lagi hai kyaa na duniyaa hai na uljhan hai sukun hai bas Thikaane ab miri miTTi lagi hai kyaa kitaabein ghar mire suraj si raushan hain tire kamre mein ye batti lagi hai kyaa zabaan se aah kyaa uf tak nahin nikli to ab ke choT kuchh gahri lagi hai kyaa miTaa loge jihaalat ko 'sikandar' tum tumhein bhi ye nai dhunki lagi hai kyaa"

"chhaanv afsos daaimi na rahi dhuup kaa kyaa rahi rahi na rahi aasraa chhin gayaa hai jiine kaa aas thi jo rahi-sahi na rahi ho gayaa khvaab phuul saa chehra shaakh-e-dil bhi hari-bhari na rahi bah gae aansuon ke dariyaa mein aap ki baat yaad hi na rahi ik udaasi thi raat thi ham the aur phir haajat-e-khushi na rahi mashvara jas kaa tas rahaa lekin mashvaron ki kabhi kami na rahi vaaqia jo huaa huaa lekin daastaan aap se juDi na rahi un ilaaqon mein kyaa rahaa saahib jin ilaaqon mein shaaeri na rahi ik tamannaa thi teri mahfil mein kyuun rahein ham agar vahi na rahi"

"bahut chup huun ki huun chaunkaa huaa main zamin par aa giraa uDtaa huaa main badan se jaan to jaa hi chuki thi kisi ne chhu liyaa zinda huaa main na jaane lafz kis duniyaa mein khoe tumhaare saamne gungaa huaa main bhanvar mein chhoD aae the mujhe tum kinaare aa lagaa bahtaa huaa main ba-zaahir dikh rahaa huun tanhaa tanhaa kisi ke saath huun bichhDaa huaa main chalaa aayaa huun sahraaon ki jaanib tumhaare dhyaan mein Duubaa huaa main ab apne-aap ko khud DhunDhtaa huun tumhaari khoj mein niklaa huaa main miri aankhon mein aansu to nahin hain magar huun ruuh tak bhigaa huaa main banaai kis ne ye tasvir sachchi vo ubhraa chaand ye Dhaltaa huaa main"

"baandhte shaaeri mein ho til ko kyaa koi raas aa gayaa dil ko jaanti hain ki ab vidaai hai kashtiyaan chumti hain saahil ko kaam sab ho gae mire aasaan kaun samjhegaa meri mushkil ko paanv mein aankh to nahin phir bhi dekhte hain qadam ye manzil ko shaam hai main huun band kamra hai DhunDhte hain charaag mahfil ko gham se ik umr ke maraasim hain toD duun kaise main salaasil ko dekh kar ro paDaa miri haalat kaun saa gham hai mere qaatil ko"

"hausla bhale na do uDaan kaa tazkira to chhoD do thakaan kaa iinT ugti dekh apne khet mein ro paDaa hai aaj dil kisaan kaa kapDe aur roTiyaan milin magar masala abhi bhi hai makaan kaa mujh mein koi hiire hain jaDe hue sab kamaal hai tire bakhaan kaa ik nadi ke do kinaaron aisaa hai faasla hamaare darmiyaan kaa chaahtaa huun main hi qissa-go banun dard ki tavil daastaan kaa shab hamaaraa chaand chhat pe aayaa to rang uD gayaa thaa aasmaan kaa main charaagh se jalaa charaagh huun raushni hai pesha khaandaan kaa kar gayaa khamosh mujh ko der tak chikhnaa vo ek be-zabaan kaa"

"band darvaaze khule ruuh mein daakhil huaa main chand sajdon se tiri zaat mein shaamil huaa main khinch laai hai mohabbat tire dar par mujh ko itni aasaani se varna kise haasil huaa main muddaton aankhein vazu karti rahin ashkon se tab kahin jaa ke tiri diid ke qaabil huaa main jab tire paanv ki aahaT miri jaanib aai sar se paa tak mujhe us vaqt lagaa dil huaa main jab main aayaa thaa jahaan mein to bahut aalim thaa jitni taalim mili utnaa hi jaahil huaa main phuul se zakhm ki khushbu se moattar ghazlein lutf dene lagin aur dard se ghaafil huaa main moajaze ishq dikhaataa hai 'sikandar'-saahib choT to us ko lagi dekhiye choTil huaa main"

"tire kuche mein jo baiThaa hai paagal vo dil se haath dho baiThaa hai paagal tasavvur mein tumhaaraa saath paa kar lo apne hosh kho baiThaa hai paagal tiri khushbu jidhar ko jaa rahi hai usi jaanib hi to baiThaa hai paagal zamaane par to khul kar hans rahaa thaa tire chhute hi ro baiThaa hai paagal ishaare ishq ki maujon ke paa kar badan-kashti Dubo baiThaa hai paagal taaaruf yuun miraa deti hai duniyaa chale jaao ki vo baiThaa hai paagal sukhan-var fikr ke lamhon mein aksar lage hai yuun ki go baiThaa hai paagal tumhaare dar pe kitni muddaton se nigaahein pher lo baiThaa hai paagal miri aankhon ke ziine se utar kar miraa daaman bhigo baiThaa hai paagal"

"aankhon ki dahliz pe aa kar baiTh gai teri surat khvaab sajaa kar baiTh gai kal teri tasvir mukammal ki main ne fauran us par titli aa kar baiTh gai taanaa-baanaa bunte bunte ham udhDe hasrat phir thak kar ghash khaa kar baiTh gai khoj rahaa hai aaj bhi vo gular kaa phuul duniyaa to afvaah uDaa kar baiTh gai rone ki tarkib hamaare aai kaam gham ki miTTi paani paa kar baiTh gai vo bhi laDte laDte jag se haar gayaa chaahat bhi ghar-baar luTaa kar baiTh gai buDhi maan kaa shaayad lauT aayaa bachpan guDiyon kaa ambaar lagaa kar baiTh gai ab ke charaaghon ne chaunkaayaa duniyaa ko aandhi aakhir mein jhunjhlaa kar baiTh gai ek se baDh kar ek the daavn sharaafat ke jiit magar ham se katraa kar baiTh gai tere shahr se ho kar aai tez havaa phir dil ki buniyaad hilaa kar baiTh gai"

"rishta bahaal kaash phir us ki gali se ho ji chaahtaa hai ishq phir usi se ho khvaahish hai pahunchun ishq ke main us maqaam par jab un kaa saamnaa meri divaangi se ho ab mere sar pe sab ko hansaane kaa kaam hai main chaahtaa huun kaam ye sanjidgi se ho kapDon ki vajh se mujhe kamtar na aankiye achchhaa ho meri jaanch-parakh shaairi se ho"

"achaanak saare manzar bol uTThe hansi gunji to patthar bol uTThe paDhaa jaise hi main ne ishq-naama sabhi jaanib se khanjar bol uTThe vahi suuni saDak thi aur main thaa tiri yaadon ke lashkar bol uTThe zabaanein band hongi shahr-bhar ki kisi din gar samundar bol uTThe main jin ke hijr mein sar dhun rahaa thaa vo ik din mere andar bol uTThe"

"rishta bahaal kaash phir us ki gali se ho ji chaahtaa hai ishq dobaara usi se ho anjaam jo bhi ho mujhe is ki nahin hai fikr aaghaaz-e-daastan-e-safar aap hi se ho khvaahish hai pahunchun ishq ke main us maqaam par jab un kaa saamnaa miri divaangi se ho kapDon ki vajh se mujhe kam-tar na aankiye achchhaa ho meri jaanch-parakh shaaeri se ho ab mere sar pe sab ko hansaane kaa kaam hai main chaahtaa huun kaam ye sanjidgi se ho duniyaa ke saare kaam to karnaa dimaagh se lekin jab ishq ho to 'sikanndar' vo ji se ho"