Ghazal

"phir ek baar tiraa tazkira nikal aayaa mujhe taraashaa to paikar tiraa nikal aayaa ye mere ghar ke darichon mein raushni kaisi yahaan charaagh kaa kyaa silsila nikal aayaa jo naqsh naqsh asiri kaa sehr jaante the un aainon se bhi saayaa miraa nikal aayaa main apne shor mein kab tak dabaa huaa rahtaa sadaaein detaa huaa be-sadaa nikal aayaa lipaT ke rotaa rahaa vo bujhe charaaghon se ki taaq taaq koi silsila nikal aayaa diyaa thaa jis ko zamaane ne tere qurb kaa naam mire hi qadmon se vo faasla nikal aayaa"

"jab khema-zano! zor havaaon kaa ghaTegaa khuun meri hatheli kaa tanaabon pe malegaa ho pyaas to khud apne hi honTon kaa lahu chuus sukhi hui jhilon mein tujhe kuchh na milegaa jalte hue raston ke liye dekh liyaa kar khiDki na khulegi to dhuaan aur ghuTegaa basti mein gharibon ki jahaan aag lagi thi sunte hain vahaan ek nayaa shahr basegaa peDon ki agar nasl-kushi khatm nahin ki kuchh din mein yahaan peDon kaa saaya bhi bikegaa bas aag ubal sakti hain ye murda zaminein bekaar si koshish hai yahaan kuchh na ugegaa vo murda-dili shaam se pahle ki adaa thi is vaqt to 'kaifi' kisi maqtal mein milegaa"

"aaina thaa to jo chehra thaa miraa apnaa thaa mujh mein jo aks bhi utraa thaa miraa apnaa thaa vo jo aahaT thi koi ruup nahin dhaar saki vo jo divaar pe saayaa thaa miraa apnaa thaa vo jo honTon pe tapan si thi vo meri zid thi vo jo dariyaaon pe pahraa thaa miraa apnaa thaa mere raste mein jo raunaq thi mere fan ki thi mere ghar mein jo andheraa thaa miraa apnaa thaa ajnabiyyat kaa vo ehsaas thaa meri qismat vo jo apnaa nahin lagtaa thaa miraa apnaa thaa meri sochon mein jo manzil thi meri apni thi mere qadmon mein jo rasta thaa miraa apnaa thaa sirf paani pe to qabza thaa mere dushman kaa mujh mein jo khuun kaa dajla thaa miraa apnaa thaa"

"khud hi uchhaalun patthar khud hi sar par le luun jab chaahun suune mausam se manzar le luun aaine se meraa qaatil mujh ko pukaare laao main bhi apne haathon patthar le luun jin raston ne jaan o dil par zakhm sajaae un raston se pujne vaale patthar le luun main shankar se zahr kaa pyaala chhin ke pi luun lahje ke is karb mein saare manzar le luun mujh se kahe to apne dil ki baat vo zaalim us ke dil kaa bojh main apne sar par le luun kuchh le de kar baat banaa luun apni 'kaifi' kuchh duniyaa ko hans kar duun kuchh ro kar le luun"

"vo aaj lauT bhi aae to is se kyaa hogaa ab us nigaah kaa patthar se saamnaa hogaa zamin ke zakhm samundar to bhar na paaegaa ye kaam dida-e-tar tujh ko saunpnaa hogaa hazaar neze udhar aur main idhar tanhaa miri shikast kaa unvaan hi dusraa hogaa jo tez dhuup mein saayon ki fasl bote hain yahaan ki aab o havaa kaa unhein pata hogaa main aur ek qadam us ki samt baDh jaataa pata na thaa ki vo itnaa gurez-paa hogaa miraa yaqin hai ki raah-e-vafaa mein mere baad miraa safar tire qadmon ne tai kiyaa hogaa"

"khud se milne ke liye khud se guzar kar aayaa kis qadar sakht muhim thi ki jo sar kar aayaa laash hotaa to ubhar aataa ki ik main hi kyaa sath par koi bhi patthar na ubhar kar aayaa sirf darvaaze talak jaa ke hi lauT aayaa huun aisaa lagtaa hai ki sadiyon kaa safar kar aayaa chaand qadmon pe paDaa mujh ko bulaataa hi rahaa main hi khud baam se apne na utar kar aayaa mujh ko aanaa hi thaa ik roz haqiqat ke qarib zindagi mein nahin aayaa thaa to mar kar aayaa"

"vo sard faasla bas aaj kaTne vaalaa thaa main ik charaagh ki lau se lipaTne vaalaa thaa bahut bikheraa mujhe mere mehrbaanon ne miraa vajud hi lekin simaTne vaalaa thaa bachaa liyaa tiri khushbu ke farq ne varna main tere vahm mein tujh se lipaTne vaalaa thaa usi ko chumtaa rahtaa thaa vo ki us ko bhi 'aziz thaa vahi baazu jo kaTne vaalaa thaa mujhi ko raah badalni thi so badal Daali kahin pahaaD bhi Thokar se haTne vaalaa thaa talaash jis ki thi vo harf mil gayaa varna main ek saada varaq aur ulaTne vaalaa thaa ye kis ko tiir chalaane kaa shauq jaag uThaa vo baaz meri taraf hi jhapaTne vaalaa thaa"

"tu ik qadam bhi jo meri taraf baDhaa detaa main manzilein tiri dahliz se milaa detaa khabar to detaa mujhe mujh ko chhoD jaane ki main vaapsi kaa tujhe raasta bataa detaa mujhe to rahnaa thaa aakhir had-e-taayyun mein vo paas aataa to main faasla baDhaa detaa ham ek the to hamein be-sadaa hi rahnaa thaa pukaartaa vo kise main kise sadaa detaa vo khvaab dekh rahi thiin ye jaagti aankhein charaagh khud nahin bujhtaa to main bujhaa detaa havaa ke rukh pe miraa gaanv hi na thaa varna jo muTThiyon mein bhari thi vo khaak uDaa detaa"