Ghazal

"darmiyaan faasla rah gayaa vo khafaa thaa khafaa rah gayaa ham se ehsaan utre nahin sar jhukaa thaa jhukaa rah gayaa khvaahishein naa-mukammal rahin zehn par bojh saa rah gayaa oDh liin main ne khaamoshiyaan masala masala rah gayaa kis qadar khubsurat ho tum aaina sochtaa rah gayaa vo gayaa aur 'mashkur' main duur tak dekhtaa rah gayaa"

"junun ki sarparasti chaahti hai baghaavat ab bulandi chaahti hai bhulaa kar farq sab achchhe bure kaa ye duniyaa bas taraqqi chaahti hai marein hindu musalmaan buDhe bachche siyaasat sirf kursi chaahti hai takabbur naa-gavaari kaa sabab hai ibaadat aajizi bhi chaahti hai faqat vaadon se ye bujhti nahin hai shikam ki aag roTi chaahti hai ye chingaari siyaasat ki vatan mein tabaahi hi tabaahi chaahti hai use 'mashkur' hai meri tamannaa magar sab ki vo marzi chaahti hai"

"mire sukun miri har khushi ko le Duubaa tiraa fareb miri zindagi ko le Duubaa charaagh-e-raah se kuchh raushni mayassar thi havaa kaa zor usi raushni ko le Duubaa tire visaal mein raunaq thi mere chehre par tiraa firaaq miri taazgi ko le Duubaa badalne vaali thi taqdir meraa mustaqbil miraa junun miri behtari ko le Duubaa taraqqiyon ko tasalsul hai inkisaari mein ghurur aayaa ki bas aadmi ko le Duubaa labon ne sabr tahammul ko khaa liyaa 'mashkur' sitam tumhaaraa miri khaamoshi ko le Duubaa"

"is qadar bhi dukhi nahin the ham jaise ab hain kabhi nahin the ham dusraa us ko mil gayaa koi aakhiri aadmi nahin the ham har zarurat ki ek qimat thi aur itne dhani nahin the ham kaise chaahat kisi ko de dete yaar itne sakhi nahin the ham kaise daaman bachaate duniyaa se aadmi muttaqi nahin the ham jo tasavvur thaa us ke khvaabon mein hu-ba-hu kyaa vahi nahin the ham ab to 'mashkur' aisaa lagtaa hai tere dil mein kabhi nahin the ham"

"masala hai to koi hal bhi nikaalaa jaae aao haalaat ko mil-jul ke sambhaalaa jaae ham to aaina-sifat log hain sach boleinge ham pe hargiz na koi sang uchhaalaa jaae yaa to khvaabon mein haqiqat kaa koi rang bharo yaa to kah do ki koi khvaab na paalaa jaae ishq mein haar bhi mumkin hai magar badle mein phuul se chehron pe tezaab na Daalaa jaae talkh lahje se bani baat bigaD jaati hai soch kar lafz koi munh se nikaalaa jaae jin se 'mashkur' sanbhaalaa na gayaa ghar apnaa kaise phir un se bhalaa mulk sanbhaalaa jaae"

"mere liye to phir koi meraa nahin huaa tujh se bichhaD ke main bhi kisi kaa nahin huaa us ne bhi khvaahishon ko bahakne nahin diyaa main bhi junun-e-ishq mein andhaa nahin huaa boyaa thaa ham ne jo bhi vahi kaaTnaa paDaa kaise kahein ki jo huaa achchhaa nahin huaa vaqt-e-duaa ye khauf sataataa rahaa mujhe maqbul kyaa miraa koi sajda nahin huaa shab-bhar tumhaari yaad kaa pahra lagaa rahaa phir aaj ham pe niind kaa hamla nahin huaa dushvaariyon mein ham ko khudaa yaad aa gayaa varna to ek vaqt kaa sajda nahin huaa 'mashkur' ki sadaa pe vo muD kar na aa sakaa naaraaz ham se vo kabhi itnaa nahin huaa"

"aisaa nahin duaaon mein maangaa nahin tujhe qismat mein hi nahin thaa jo paayaa nahin tujhe dil to aqidaton ki hadon se guzar gayaa vo to khudaa kaa khauf thaa puujaa nahin tujhe sab muntazir the meri nigaahein kidhar uThein main ne bhi ehtiyaat mein dekhaa nahin tujhe shaayad palaT ke dekh le tu hi meri taraf main ne isi umiid pe rokaa nahin tujhe tere khayaal saath the mere qadam qadam main to kisi qadam pe bhi bhulaa nahin tujhe andesha-e-judaai ke Dar mein jiyaa huun main ye mat samajh ke TuuT ke chaahaa nahin tujhe vo pal haraam ho gayaa 'mashkur' ke liye jis pal tasavvuraat mein paayaa nahin tujhe"

"jab koi sach baat chhupaani paDti hai tab jhuTi ik baat banaani paDti hai andar andar kitne hi ham zakhmi hon chehre par muskaan sajaani paDti hai e'timaad bhi had se ziyaada Thiik nahin kabhi kabhi to munh ki khaani paDti hai armaanon ki laash uThaa kar kaandhon par kisi kisi ko umr bitaani paDti hai kabhi kabhi kuchh yaad bhi rakhnaa paDtaa hai kabhi kabhi har baat bhulaani paDti hai ham se hi dahshat-gardi hai aur hamein sab se ziyaada jaan ganvaani paDti hai thapki de kar ham ko to 'mashkur' yahaan teri tamannaa roz sulaani paDti hai"

"tirgi mein ek pal kaa hi sahaaraa kar gayaa vo charaaghon ki tarah shab mein ujaalaa kar gayaa justuju khvaahish talab hasrat tamannaa aarzu jaate jaate vo sabhi jazbon ko ThanDaa kar gayaa faasla kuchh bhi nahin thaa jism-o-jaan ke darmiyaan vo magar us mein bhi thoDaa faasla saa kar gayaa ye bahut achchhaa kiyaa ki pher li us ne nazar kam se kam mere yaqin ko aur pakkaa kar gayaa abr kaa vo ek TukDaa thaa bahut chhoTaa magar chilchilaati dhuup mein kuchh der saaya kar gayaa is qadar dushvaariyon kaa ye baDaa ehsaan hai haadson kaa silsila imaan pukhta kar gayaa khvaab aankhon ko dikhaa kar saare manzar le liye mujh ko binaai ataa kar ke vo andhaa kar gayaa main use ilzaam duun 'mashkur' ye mumkin nahin vo mere alfaaz le kar mujh ko gungaa kar gayaa"

"vo hamein aur ham unhein bas duur se dekhaa kiye umr-bhar ik dusre ko ham yunhi chaahaa kiye us ne vaada toD Daalaa ye use haq thaa magar kis qadar maasum the ham raasta dekhaa kiye paa liyaa ahl-e-junun ne phir shahaadat kaa maqaam aql vaale maghfirat ki hi duaa maangaa kiye tu ne meri samt naa dekhaa palaT ke ek baar jaane vaale ham to tujh ko duur tak dekhaa kiye baanT di allaah ne vaqt-e-sahar sab neamatein ham se ghaafil dhuup ke chaDhne talak soyaa kiye kyaa bataaun doston apni ye dil ki daastaan ham kisi ki dil-lagi ko chaahatein samjhaa kiye"

"teri zamin ki khaak mein mil kar chale gae jaane yahaan se kitne sikandar chale gae maayusiyaan simaT ke nazar mein samaa gaiin jab tum miri nigaah se baahar chale gae sharminda-e-nazar the nazar kyaa milaate vo kuchh log apne sar ko jhukaa kar chale gae sochaa thaa ham ne saath guzaareinge zindagi tum to hamaari soch badal kar chale gae khanjar kaa ghaav jism ke baahar banaa rahaa alfaaz tere dil ke bhi andar chale gae achchhi lagi mujhe ki buri un ko kyaa gharaz jo baat un ke dil mein thi kah kar chale gae TuuTi hui thi naav kinaara qarib thaa tufaan apnaa roab dikhaa kar chale gae"

"band hai jo zabaan kholun kyaa sun sakoge mujhe main bolun kyaa tez baarish hai aur mauqa bhi main tujhe saath mein bhigo luun kyaa teri manzil hi meri manzil hai main tire saath-saath ho luun kyaa mar chukaa hai jo mujh mein zinda thaa nabz us ki main ab TaTolun kyaa main tumhaaraa huun bas tumhaaraa huun ab kisi aur se na bolun kyaa zabt 'mashkur' jaan le legaa baiTh kar thoDi der ro luun kyaa"

"tiraa firaaq muqaddar samajh liyaa ham ne ab apne-aap ko patthar samajh liyaa ham ne tumhaari yaad ke palkon pe ashk raushan the andheri shab ko munavvar samajh liyaa ham ne ye khud-farebi nahin hai to aur kyaa kahiye har ek saae ko paikar samajh liyaa ham ne sipurd kar diye saare huquq rahzan ko ye kis zalil ko rahbar samajh liyaa ham ne tamaam jism thakaavaT se chuur chuur huaa tab is zamin ko bistar samajh liyaa ham ne hamaari bhuul thi qad mein bahut jo chhoTe the unhein bhi qad ke baraabar samajh liyaa ham ne vo jis ne jaan aziyyat mein Daal di 'mashkur' use hi jaan se baDh kar samajh liyaa ham ne"

"mohabbat kaa dikhaavaa kar rahaa hai vo mere saath dhokaa kar rahaa hai samaaat ne azaan jab se suni hai miraa imaan sajda kar rahaa hai jise masnad ki chaahat ho gai hai vahi laashon kaa dhandaa kar rahaa hai ibaadat ilm ki aaghosh mein hai koi qatre ko dariyaa kar rahaa hai koi masruf hai shukr-e-khudaa mein koi din-raat shikva kar rahaa hai jahaan mein kis liye bhejaa gayaa thaa magar 'mashkur' kyaa kyaa kar rahaa hai"

"khulegi niind khvaabon kaa gharaundaa TuuT jaaegaa haqiqat ru-ba-ru hogi to sapnaa TuuT jaaegaa tumhein to chaand bannaa hai miri taarik raaton kaa sitaara tum nahin bannaa sitaaraa TuuT jaaegaa mujhe apnon yaa ghairon se koi shikva nahin lekin fareb itne mileinge to bharosa TuuT jaaegaa miraa maasum dil to fitratan shishe ke jaisaa hai musalsal vaar hone par to lohaa TuuT jaaegaa abhi kuchh vaqt baaqi hai shajar pe zard patte kaa havaaein tez hone se ye pattaa TuuT jaaegaa tumhein har haal mein 'mashkur' us ko bhuul jaanaa hai iraada tum nahin karnaa iraada TuuT jaaegaa"

"rukh-e-insaaniyat par bhige juute maar deti hai yahaan par bhuuk ab maasum bachche maar deti hai hamein maalum hai naa-jaaez-o-jaaez hai kyaa lekin shikam ki aag to saare saliqe maar deti hai mire dil mein bhi jazbe hain tamannaaein machalti hain magar ghurbat mohabbat ke iraade maar deti hai mohabbat ajnabi logon se rishta joD leti hai kudurat had se baDh jaae to rishte maar deti hai ham apni maan ki nazron mein vahi maasum bachche hain chapat vo pyaar se ab bhi hamaare maar deti hai mujhe 'mashkur' us se jab shikaayat hone lagti hai vo nam aankhon se mere saare shikve maar deti hai"