Ghazal

"is ki shikaayat kaun karegaa dil ki vo haalat gar na rahi baare tere talavvun se yaksaani-e-shaam-o-sahar na rahi apni tarah is vahshat-gaah mein har unvaan se rusvaa hai jab se fughaan-e-nim-shabi mamnun-e-baab-e-asar na rahi unchi shaakh kaa phuul bhi kyaa aur qurbat ki makhmuri kyaa dur-o-qarib ki koi yaad bhi raahat-e-dil ban kar na rahi jiite rahe to Thaani hai ye naumidaana ziist karein aur koi tadbir na thi jo ab tak pesh-e-nazar na rahi kis birte par baatein banaaein yaani sher shiaar karein rang-e-zamaana dekh ke ham ko himmat-e-arz-e-hunar na rahi"

"tire jalve tere hijaab ko meri hairaton se numu mili ki thaa shab se din kabhi tira-tar kabhi shab hi aaina-ru mili tiri qurbaton se bhi kyaa huaa tiri duriyon kaa to kyaa gila vo maqaam main hi na paa sakaa mujhe jis maqaam pe tu mili vo havaaon hi se baras paDe vo tiri nigah se chhalak uThe koi be-khudi na hamein mili ki jo be-niyaaz-e-subu mili vo ho fasl-e-gul ki fazaa-e-dil jo milaa kahin to junun milaa magar ik khirad hi na mil saki jo mili to sarf-e-rafu mili"

"thi to sahi par aaj se pahle aisi haqir faqir na thi dil ki sharaafat zehn ki jaudat itni baDi taqsir na thi sach kahte ho ham aise kahaan aur soz-o-gudaaz-e-ishq kahaan sach hai mire aaina-e-dil mein koi kabhi tasvir na thi ab jo uchaaT hui hai tabiat shaayad ab ham rukhsat hain bin-kaaran be-baat vagarna aisi kabhi dil-gir na thi ahl-e-junun ko fasl-e-khizaan se ab ke bhi go na rabt rahaa ab ke bahaar vo aai ki jis ki bu-e-gul bhi safir na thi aakhir ghairat ne samjhaayaa nau-midaanaa ziist karein baaqi har tadbir to ki jo apne khilaaf-e-zamir na thi"

"dhyaan ki mauj ko phir aaina-simaa kar lein kuchh tajalli ki huzuri kaa bhi yaaraa kar lein aaj kaa din bhi yunhi biit gayaa shaam hui aur ik raat kaa kaTnaa bhi gavaaraa kar lein jin khayaalon ke ulaT pher mein uljhin saansein un mein kuchh aur bhi saanson kaa izaafa kar lein jin malaalon se lahu dil kaa banaa hai aansu un ke aankhon se barasne kaa nazaaraa kar lein ehtiyaaton ki guzargaahein hui hain sunsaan ab chhupaayaa huaa har ghaav huvaidaa kar lein"

"phir bahaar aai hai phir josh mein saudaa hogaa zakhm-e-derinaa se phir khuun Tapaktaa hogaa biiti baaton ke vo naasur hare phir honge baat niklegi to phir baat ko rakhnaa hogaa yurishein kar ke umanD aaeingi suuni shaamein laakh bhaTkein kisi unvaan na saveraa hogaa ji ko samjhaaeinge matvaali havaa ke jhonke phir koi laakh sambhaale na sambhalnaa hogaa kaisi rut aai havaa chalti hai ji Doltaa hai ab to hansnaa bhi taDapne kaa bahaanaa hogaa TuuT jaaegaa ye laachaari-e-daaem kaa fusun aur is tarah ki jaise koi aataa hogaa dil dhaDakne ki sadaa aaegi sune-pan mein duur baadal kahin parbat pe garajtaa hogaa"

"shokh the rang har ik daur mein afsaanon ke dil dhaDakte hi rahe aas mein insaanon ke ilm ne khair na chaahi kabhi insaanon ki zarre barbaad yunhi to nahin viraanon ke raahein shahron se guzarti rahin viraanon ki naqsh milte rahe kaabe mein sanam-khaanon ke zindagi vaalaa-o-shaidaa rahi farzaanon ki naam raushan hue har daur mein divaanon ke maryami morid-e-tohmat rahi armaanon ki TukDe ik daftar-e-ilzaam hain daamaanon ke fikr sab ko hai rafu ke liye saamaanon ki puchhtaa koi nahin haal girebaanon ke qadr kuchh kam to nahin ab bhi tan-aasaanon ki roz o shab aaj bhi bhaari hain giraan-jaanon ke"

"raat ke baad vo subh kahaan hai din ke baad vo shaam kahaan jo aashufta-sari hai muqaddar us mein qaid-e-maqaam kahaan bhigi raat hai suuni ghaDiyaan ab vo jalva-e-aam tamaam bandhan toD ke jaaun lekin ai dil ai naakaam kahaan ab vo hasrat-e-rusvaa ban kar juzv-e-hayaat hai barson se jis se vahshat karte the tum ab vo khayaal-e-khaam kahaan ziist ki rah mein ab ham be-his tanhaa sar-ba-girebaan hain kuchh aalaam kaa saath huaa thaa vo bhi naafarjaam kahaan karni karte raahein takte ham ne umr ganvaai hai khubi-e-qismat DhunD ke haari ham aise naakaam kahaan apne haal ko jaan ke ham ne faqr kaa daaman thaamaa hai jin daamon ye duniyaa milti utne hamaare daam kahaan"

"nur-e-sahar kahaan hai agar shaam-e-gham gai kab iltifaat thaa ki jo khu-e-sitam gai pheraa bahaar kaa to baras do baras mein hai ye chaal hai khizaan ki jo ruk ruk ke tham gai shaayad koi asiir abhi tak qafas mein hai phir mauj-e-gul chaman se jo baa-chashm-e-nam gai qabze mein josh-e-gul na khizaan dastaras mein hai raahat bhi kab mili hai agar vajh-e-gham gai haan tarh-e-aashiyaan bhi unhin khaar-o-khas mein hai bijli jahaan pe khaas ba-rang-e-karam gai haan shaaiba gurez kaa bhi pesh-o-pas mein hai vo be-rukhi ki naaz kaa thi jo bharam gai ab kaaenaat aur khudaaon ke bas mein hai ab rahbari mein qudrat-e-dair-o-haram gai jaadu ghazal kaa jazb-e-tamannaa ke ras mein hai yaani vo dil ki baat dilon mein jo dam gai"

"maut ko ziist tarasti hai yahaan maut hi kaun si sasti hai yahaan dam ki mushkil nahin aasaan karte kis qadar uqda-parasti hai yahaan sab kharaabe hain tamannaaon ke kaun basti hai jo basti hai yahaan chhoDo be-sarfa hain saavan bhaadon dekho har aankh barasti hai yahaan ab to har auj kaa taaraa Duubaa auj kaa naam hi pasti hai yahaan"

"ki shab-e-hashr miri shaam-e-javaani tum ne chheDi kis daur ki kis vaqt kahaani tum ne maaani-o-lafz mein jo rabt hai main jaan gayaa khole is tarah se asraar-e-maaani tum ne meri aankhon hi mein the an-kahe pahlu us ke vo jo ik baat suni meri zabaani tum ne meri taarikh ne daaim tumhein baaqi samjhaa rakkhaa har daur mein daaim mujhe faani tum ne main to har dhuup mein saayon kaa rahaa huun juuyaa mujh se likhvaai saraabon ki kahaani tum ne meri har baat mein sau aib the har aib mein shaakh ye ghanimat hai miri qadr bhi jaani tum ne"

"aakhir dil ki puraani lagan kar ke hi rahegi faqir hamein har rut aate jaate paae ek hi shai kaa asiir hamein dhuum machaae bahaar kabhi aur paat hare kabhi piile hon har nairangi-e-qudrat dekhe yaksaan hi dil-gir hamein kyaa kyaa pukaarein sisakti dekhin lafzon ke zindaanon mein chup hi ki talqin kare hai ghairat-mand zamir hamein jin ki halki gahri talkhi khuun mein rach rach jaati hai juzv-e-hayaat banaane paDe hain vo ashaar-e-'mir' hamein"

"vahi ik pukaar vahi fughaan miri mohr-e-dida-o-lab mein hai hai karaah jo shab-o-roz ki jo fazaa ke shor-o-shaghab mein hai kabhi din Dhale pe ho saamnaa kabhi diid aakhir-e-shab mein hai hai yahi maaal-e-talab miraa tu miri ibaadat-e-rab mein hai kabhi faaslon ki masaafaton pe ubuur ho to ye kah sakun miraa jurm hasrat-e-qurb hai to yahi kami yahaan sab mein hai sahar-e-azal ko jo di gai vahi aaj tak hai musaafiri use tai karein to pata chale kahaan kaun kis ki talab mein hai koi aur tarz-e-hayaat bhi mujhe ab rahin-e-karam bataa ki hai baat meri giraftani miri chup bhi su-e-adab mein hai"

"bastiyaan kaise na mamnun hon divaanon ki vusatein in mein vahi laae hain viraanon ki kal gine jaaeinge zumre mein sitam-raanon ke khair maangeinge agar aaj sitam-raanon ki khvaab baatil bhi to hote hain tan-aasaanon ke sai-e-mashkur bhi hoti hai giraan-jaanon ki zakhm shaaki hain azal se namak-afshaanon ke baat rakkhi gai har daur mein paikaanon ki vo binaa saaz bhi hote hain gulistaanon ke khaak jo chhaante phirte hain bayaabaanon ki TukDe jo ginte hain TuuTe hue paimaanon ke jaan ban jaate hain aakhir vahi mai-khaanon ki tevar aate hain haqiqat mein bhi afsaanon ke kuchh haqiqat bhi huaa karti hai afsaanon ki ho bhi jaate hain rafu chaak-girebaanon ke tang bhi hoti hai pahnaaiyaan daamaanon ki ibrat-aabaad bhi dil hote hain insaanon ke daad milti bhi nahin khun-shudaa armaanon ki zarre zindaan-e-malaamat bhi hain viraanon ke dar banaa karti hain divaarein hi zindaanon ki"