Ghazal

"zinat-e-unvaan hai mazmun aalam-e-tauhid kaa matla-e-divaan na kyuun matla bane khurshid kaa ye savaad-e-naama hai yaa surma-e-taskhir hai hai bayaaz-e-safha yaa hai nuur subh-e-id kaa dair mein hai vo na hai kaabe mein aur hai sab kahin taalib-e-nazzaara ko gar ho saliqa diid kaa ho jo us ke naam par aaghaaz puuraa ho vo kaam hai bar-aarinda vahi har shakhs ki ummid kaa jo milaa us se use kahtaa hai aalam mar gayaa naam murda rakh diyaa hai zinda-e-jaaved kaa lan-taraani hi rahi us shokh ko ushshaaq se hausla paidaa na kis kis ko huaa go diid kaa taaza mazmun 'sehr' apni tab-e-mauzun se nikaal ho na tu tarz-e-sukhan mein aashnaa taqlid kaa"

"vasl se tab bhare hamaaraa peT peT se jab mile tumhaaraa peT thak gae ham to bharte bharte ise khaate khaate kabhi na haaraa peT saaf dariyaa-e-husn kaa hai paaT kaisaa dilchasp hai tumhaaraa peT naaf teri hai yaar naafa-e-mushk aur fazaa-e-khutan hai saaraa peT huaa nazzaara-e-shikam na nasib 'sehr' har-chand ham ne maaraa peT"

"ghar se vo ghairat-e-pari niklaa mar gayaa koi koi ji niklaa apnaa armaan nahin kabhi niklaa kab koi matlab-e-dili niklaa isi hasrat mein tan se ji niklaa ji kaa armaan na ek bhi niklaa dushman apnaa na dost hi niklaa charkh bhi darpae-badi niklaa daavaa-e-ishq ham ko thaa ab tak ghair bhi aaj mudda'i niklaa gaaliyaan tak bhi mujh ko dete nahin is mein kyaa lutf-e-dushmani niklaa hijr kaa roz hai ghazab khunkhaar ki jahaan aayaa khuun pi niklaa abhi baiThe raho miri bar mein dil kaa armaan nahin abhi niklaa jis ko kal us ne qatl kar Daalaa vo hamaaraa hi aadmi niklaa lab-e-mai-gun ke ishq mein ab to mohtasib bhi sharaab pi niklaa hijr-e-jaanaan hai yaa ki maut miri vo uThaa bar se tan se ji niklaa haif us rashk-e-zohra yusuf kaa ghair-manhus mushtari niklaa gaaliyaan dete jaao dil le lo ye nayaa tarz-e-dilbari niklaa maut kyaa apni jaan le jaati aankh jo khol di vahi niklaa lab-e-jaan-bakhsh mat hilaa qaatil jo huaa qatl vo hi ji niklaa samjhe bulbul ko ham the aalam-e-ishq ik gulistaan kaa mubtadi niklaa chaar kaa go ghalat huaa daa'vaa ek bosa to vaajibi niklaa ghair ko chaar ham ko bose do khuub qaanun-e-munsifi niklaa ham ye samjhe ki bas vahi aayaa shab-e-hijraan mein jo koi niklaa vaa'da-e-vasl ki jo iifaa mein na unhein 'uzr koi bhi niklaa bole qaail hi kar diyaa ham ko tu baDaa koi mantiqi niklaa 'sehr' ham rind jaante the tujhe tu to pahunchaa huaa vali niklaa"

"hosh-o-shakeb-o-taab-o-sabr-o-qaraar paancho qurbaan kar chukaa huun main tujh pe yaar paancho ik dard-e-hijr se bas ye paanch aarize hain be-hoshi be-qaraari ghash tap bukhaar paancho mutrib pisar ke gham mein bhaate hain kis ke dil ko gori aiman alabbaa des aur malaar paancho imaan-o-din-o-maal-o-dil aur naqd-e-jaan bhi main kar chukaa huun pyaare tujh par nisaar paancho gar tu qasam bhi khaae jhuTe hain mere pyaare paimaan-o-ahd-o-vaada qaul-o-qaraar paancho karte hain qatl-e-aalam zaalim ye uzv tere mizhgaan-o-chashm-o-abru zulf-o-'ezaar paancho kohsaar-o-dasht-o-dariyaa gulzaar-o-bazm-e-ishrat hain khaar saan nazar mein be-ru-e-yaar paancho is tarah mein ghazal kaa likhnaa hai ghair-mumkin ai 'sehr' koi baandhe go ab hazaar paancho"

"jo mehrbaan kahin vo rashk-e-maah ho jaave to ye gadaa bhi kabhi baadshaah ho jaave jo apni shoala-fagan barq-e-aah ho jaave to kaakh-e-charkh bhi jal kar tabaah ho jaave do chaar gar miri un ki nigaah ho jaave to sab moaamla phir ru-baraah ho jaave karein safed bhi ghar ko mire agar meamaar to dud-e-aah se fauran siyaah ho jaave shab-e-visaal ki aati hain yaad yuun baatein ki khvaab mein koi jyuun baadshaah ho jaave jo jaaun aaj ki shab un ki bazm mein tanhaa to mujh pe ghair kaa kaash ishtibaah ho jaave yahi duaa hai ki anjaam ho ba-khair miraa khudaa kare ki buton se nibaah ho jaave nigaah-e-lutf jo ghairon pe hai to behtar hai kabhi idhar bhi karam ki nigaah ho jaave tire itaab ki lazzat se ye tamanna hai ki aaj bhi koi mujh se gunaah ho jaave zamaana tum pe hai ghash kyaa ajab jo hashr ke din miraa gavaah tumhaaraa gavaah ho jaave mile bhi huur jo zaahid ko khuld mein jaa kar mazaa ho vaan jo use zoaf-e-baah ho jaave nikaalo 'sehr' vo mazmun taba-e-aali se jahaan mein jis ke sabab vaah-vaah ho jaave"

"qaatil ke kuche mein hama-tan jaaun ban ke paanv mar kar hi taaki so to zaraa paaun tan ke paaon kyunkar rakhun main sair ko andar chaman ke paanv ik umr se to ho rahe khugar hain ban ke paanv bhaari hain naazuki se jo mehndi mein san ke paanv kahte hain kar diye mire kyuun laakh man ke paanv kyaa saath meraa dasht-navardi mein kar sake do-chaar chaukDi mein gae thak hiran ke paanv haathon ko hai havaa se garebaan-dari hanuz sahraa-talab hain mar ke bhi andar kafan ke paanv aanaa hai der der to jaanaa hai jald jald raftan ke aur hain tire aur aamdan ke paanv sadme se haath ke kahin gaTTaa utar na jaae kyunkar dabaaun us but-e-naazuk-badan ke paanv ai dil tu dekh us ki sar-e-zulf mein na jaa naadaan hai sar pe jo rakhe kaale ke phan ke paanv kuchh aaj ye bhi aataa hai rindo piye hue paDte hain bahke bahke jo shekh-e-zaman ke paanv pahunchaa hai ab to 'sehr' kalaam apnaa duur duur shohrat se lag gae hain hamaare sukhan ke paanv"

"yaa-rab hai aaj un ke khud aane kaa kyaa sabab ulfat jataa ke mujh ko manaane kaa kyaa sabab manzur mere rone pe hansnaa agar na thaa ghairon se hans ke mujh ko rulaane kaa kyaa sabab saabit huaa ki vasl mein hai uzr aap ko mauqe ke vaqt varna bahaane kaa kyaa sabab maanaa ki aap aane mein jaati hai shaan-e-husn par jab bulaaun main to na aane kaa kyaa sabab shaayad tumhaari zulm ki aadat hi ho gai aashiq ko varna roz sataane kaa kyaa sabab puchhaa jo main ne kitne hain aashiq tire kahaa kyon puchhte ho haal zamaane kaa kyaa sabab saahib khataa muaaf mujhe shak to kuchh nahin be-vaqt lekin aaj nahaane kaa kyaa sabab ai dil payaam-e-vasl ye un ki taraf se hai is vaqt varna baam pe aane kaa kyaa sabab ai 'sehr' kyaa hai dil kahin aaya bataaiye ku-e-butaan mein roz ke jaane kaa kyaa sabab"

"kahein kyaa ki kyaa kyaa sitam dekhte hain likhaa hai jo qismat mein ham dekhte hain kabhi aah naara kabhi khinchte hain ham is saaz kaa zer-o-bam dekhte hain khat-e-sar-navisht apnaa ham paDh rahe hain tumhaaraa jo naqsh-e-qadam dekhte hain mire ru-ba-ru vo baham ghair se hain na dekhe koi jo ki ham dekhte hain rahi gar talaash-e-kamar yuun hi ham ko koi dam mein mulk-e-adam dekhte hain hazaaron gumaan dil mein hote hain paidaa tire haath mein jab qalam dekhte hain nahin jaanaa kis din tu ghairon ke ghar par sarihan to aankhon se ham dekhte hain nahin aarzu kuchh bhi bose ki ham ko magar ham tumhaaraa karam dekhte hain jo aalam ki dekhaa hai ku-e-butaan mein khudaa ki khudaai mein kam dekhte hain nazar aate ho 'sehr' aashiq kisi par tumhein har ghaDi chashm-e-nam dekhte hain"

"subha se matlab na kuchh zunnaar se hain judaa ham kaafir o din-daar se ishq hai us abru-e-khamdaar se kaaTungaa ik din galaa talvaar se dil miraa aTkaa hai chashm-e-yaar se hai mohabbat mardum-e-bimaar se yuun evaz luun ji mein hai aghyaar se ghar jalaa duun aah-e-aatish-baar se hain ayaan kuchh ishq ke aasaar se sho'le uThte hain dil-afgaar se kyuun na dil apnaa nazaar-o-zaar ho kuchh nazar aate ho tum bezaar se rashk se dil mein na kyuun jal jaae sham' lau nikalti hai tire rukhsaar se hijr mein ho kyuun na lazzat vasl ki hai mazaa inkaar mein iqraar se kucha-e-kaakul mein kho kar naqd-e-dil mol saudaa laae ham baazaar se jhaanke rauzan se jo tujh ko rakhna-gar phoD Daalun sar ko main divaar se jaan aafat mein paDi hai ai tabib maut behtar hijr ke aazaar se har qadam par shor-e-mahshar hai bapaa piste hain dil aap ki raftaar se khizr laa kar dein agar aab-e-baqaa main na badlun sharbat-e-didaar se tegh-e-abru kaa jo bosa de to de varna zaalim qatl kar talvaar se khilat-e-uryaani aur jaagir-e-dasht ham ne paayaa ishq ki sarkaar se sarv ke chehra kamar siina kahaan is ko kyaa tashbih qadd-e-yaar se hijr mein jangal se hai gulshan sivaa gul bhi mujh ko kam nahin hain khaar se jaa-e-aasaaish nahin hai dusri baDh ke tere saaya-e-divaar se roz tanhaai mein rahti hai yahaan guftugu pahron khayaal-e-yaar se zulf-o-aariz chashm-o-abru khaal-o-khat dil nahin bachtaa inhin do-chaar se bosa ab qand-e-mukarrar ho gayaa duuni lazzat ho gai takraar se shart mein boson ki bhi kyaa lutf hai jiit mein kam-tar mazaa hai haar se ek gul-ru par huaa dil daagh daagh phuul laae aaj ham gulzaar se koi mai-kash phir na baiThaa ek dam main jo uThThaa khaana-e-khummaar se bulbulein us rashk-e-gul ke hijr mein nochti hain apne par minqaar se 'sehr' bhejeinge ghazal ye yaar ko shauq hai us ko mire ash'aar se"

"dil ko jis vaqt khayaal saf-e-mizhgaan hogaa paa-e-jaan mein khalish-e-khaar-e-mughilaan hogaa taalib-e-marg huun yaaro na karo chaara miraa mujh pe ehsaan jo na kijegaa to ehsaan hogaa vaaizaa huur mile khuld mein to kyaa haasil ham ko kab chain ba-juz sohbat-e-insaan hogaa ba-khudaa hotaa na hargiz kabhi khvaahaan teraa jaantaa gar tu miri jaan kaa khvaahaan hogaa us mah-e-hind se ho tu na muqaabil hargiz munfail varna bahut ai mah-e-kanaan hogaa aur pairaaye mein mumkin nahin qudrat kaa zuhur hai yaqin mujh ko khudaa surat-e-insaan hogaa maktab-e-gham mein hai majnun se talammuz ham ko ab bayaabaan kaa sabaq jaa-e-gulistaan hogaa is qadar tang huun ho jaaungaa khud kaafir main dil-e-kaafir jo kabhi meraa musalmaan hogaa vasl phir ho ki na ho dil ki tasalli ko mire apne munh se to zaraa kah de ki haan haan hogaa baagh mein naala-e-bulbul hi khush aae shaayad khanda-e-gul se mizaaj apnaa pareshaan hogaa mol gham ham ne liyaa khud na karegaa aisaa ba-khudaa gar koi naadaan se naadaan hogaa tishna-lab jis ke liye phirte hain sab khizr-o-masih yaar teraa hi dahan chashma-e-haivaan hogaa is qadar jald jo ai ahd-shikan TuuT gayaa rishta-e-jaan hamaaraa tiraa paimaan hogaa vaaizaa khuld mein kyaa vasl-e-butaan bhi hogaa ham na jaaeinge jo vaan bhi gham-e-hijraan hogaa uns hai maadda-e-asl-o-sarisht-e-insaan ulfat insaan se rakkhegaa jo insaan hogaa mujh ko fursat thi kahaan rone ki rotaa kyunkar mujh pe baandhaa kisi dushman ne ye tufaan hogaa saiqal-e-ishq se aaina hai haalat meri jo mire haal ko dekhegaa vo hairaan hogaa sun ke ashaar tire bazm-e-sukhan mein ai 'sehr' vo phaDak jaaegaa jo koi sukhan-daan hogaa"

"dil tang us mein ranj-o-alam shor-o-shar hon jam' chain aae khaak ghar mein jab itne zarar hon jam' dil mein jo farq Daal diyaa hai raqib ne ho jaae bar-taraf kahin ham tum agar hon jam' jis ne kiyaa hai qatl vahi aae naa'sh par kyaa faaeda hai yuun jo hazaaron bashar hon jam' aae na kaam ek bhi be-yaari-e-nasib go zaat mein kisi ke hazaaron hunar hon jam' jaataa hai yaar maangein nishaani to kis tarah apne kahin havaas bhi vaqt-e-safar hon jam' likkhi ghazal to khuub magar ye zarur hai paDhnaa tab is ko 'sehr' jab ahl-e-hunar hon jam'"

"ai shoala-rukh itnaa hai tiraa rang-e-badan surkh pahne hai safed aur nazar aati hai chikan surkh kyaa tere shahidon mein huaa khuun lagaa kar kis vaaste hai laala-e-hamraa hama-tan surkh nilam hai dharaa huqqa-e-yaaqut mein goyaa hain daant siyah missi se paan se hai dahan surkh qatron mein araq ke hai ayaan rang badan kaa dekhaa na gayaa aaj talak durr-e-adan surkh kyunkar dil-e-khuni ko nigal jaaein na gesu hotaa hai kahaa karte hain sab saanp kaa man surkh naazuk to hai jism us kaa magar rang hai laalin vo dekh le jis ne ki na dekhaa ho saman surkh zaahid tujhe gar surkh-ru hone ki havas hai kar deti hai chehre ko mai-e-naab-e-kuhan surkh kushta main huaa huun tiri gul-pairahani par laazim hai miri laash ko dein log kafan surkh mar kar bhi rahe khuun ke ashk aankhon se jaari ai 'sehr' milaa hijr ki daulat se kafan surkh"

"dikhlaae na kyon hashr kaa aalam shab-e-furqat kuchh roz-e-qayaamat se nahin kam shab-e-furqat barpaa na ho kyon shevan-o-maatam shab-e-furqat hai haq mein mire roz-e-moharram shab-e-furqat kartaa hai falak dekh ke haalat miri zaari ye charkh se girti nahin shabnam shab-e-furqat ghabraa na bahut saa vo ab aataa hai ab aataa detaa huun dil-e-zaar ko yuun dam shab-e-furqat hain mukhtalif alfaaz magar ek hain maani zindaan malak-ul-maut jahannam shab-e-furqat maujud ho jis mein ki har ik tarah ki taa'zib sab kahte hain dozakh use aur ham shab-e-furqat dil mein mire mar jaate hain armaan hazaaron barpaa na hon kyuun naara-e-maatam shab-e-furqat duniyaa mein sadaa ranj se raahat hai moakhkhar aur vasl ki shab par hai muqaddam shab-e-furqat siina miraa kar deti hai afgaar sitam-gar sohraab huun main aur hai rustam shab-e-furqat kyaa puchhtaa hai kaun tire darpae-jaan hai ai monis-e-jaan aur miri hamdam shab-e-furqat ai 'sehr' nahin jaan ki ab khair tumhaari aati rahi gar yunhi ye paiham shab-e-furqat"

"kuchh gharaz vajh muddaaa baais kyuun khafaa ho gae ho kyaa baais mujh se ruThe ho kyuun bilaa baais kyaa khataa kyaa qusur kyaa baais ab khulaa ye ki jaan jaane kaa thaa sabab dil hi dil hi thaa baais main ne chheDaa thaa kyuun bigaDte na vo khafagi ki hui khataa baais main unhein chaahun vo ye khud chaahein koi aisaa ho yaa khudaa baais nahin milte na miliye bismillaah par bataa dijiye zaraa baais aaj kyuun vo bigaD gae ham se yaa ilaahi na kuchh khulaa baais mar gae dekh ham tiraa andaaz hai fazaa ki tiri adaa baais jab kahaa main ne aaiye mire paas do ghaDi ke liye kahaa baais tum hasin ho to chaahte hain tumhein yahi baais hai aur kyaa baais kar liyaa kaisaa aap ko taskhir 'sehr' huun varna aur kyaa baais"