Ghazal

"na koi dost ho meraa na ho adu meraa tum apne munh se agar kah do mujh ko tu meraa fasurdagi mein junun-e-havaa-e-gul yaani khizaan ke daur mein saudaa-e-rang-o-bu meraa jo tum nahin to bahaar-e-jinaan mein khaak nahin bahut vasia hai daamaan-e-aarzu meraa nibhegi ai dil-e-aavaara ab na tujh se miri bas aaj se na main teraa huun aur na tu meraa banaa rahe hain vo jalve ki apne tasvirein dikhaa dikhaa ke tamaashaa-e-rang-o-bu meraa kisi ki zulf-e-siyah kah rahi hai khul khul kar ghaTaa ne rang uDaayaa hai hu-ba-hu meraa mah-e-siyaam kaa aur intizaam kyaa karte janaab-e-shaikh uDaa le gae subu meraa jafaa kaa rang judaa hai vafaa kaa rang judaa malo na dast-e-hinaai mein tum lahu meraa taDap rahi hai jo abr-e-siyaah mein bijli firaaq mein yahi naqsha thaa hu-ba-hu meraa suhaani raat hai chhiTki hai chaandni 'muztar' miri nigaah mein phirtaa hai maah-ru meraa"

"kaam hai jam se na matlab jaam se aashnaa hain lab tumhaare naam se lab-ba-lab huun saaqi-e-gulfaam se aariyat le lein muqaddar jaam se ghar banaanaa hai kisi ki yaad kaa kaam lenaa hai dil-e-naakaam se dil bhi aankhon ki tarah mushtaaq hai lo utar aao tum apne baam se chhaa rahi hai mai-kashon par be-khudi kyaa kahaa shishe ne jhuk kar jaam se ik sitamgar se laDaataa huun nigaah jaam ko Takraa rahaa huun jaam se eid hai hangaama-e-mahshar nahin vo mileinge aaj khaas-o-aam se qabr bhi jannat hai momin ke liye chal ke 'muztar' so raho aaraam se"

"shughl hi shughl hai aur aah-e-sahar se kyaa kaam dard-mandaan-e-mohabbat ko asar se kyaa kaam aabru apni salaamat rahe zar se kyaa kaam ashk-e-tar se mujhe matlab hai guhar se kyaa kaam yaad se gesu-o-rukh ki jinhein matlab Thahraa shaam se un ko gharaz kyaa hai sahar se kyaa kaam tu ho zulfein hon tiri shaana ho aaina ho tujh ko be-dard mire dard-e-jigar se kyaa kaam teri ulfat hi nahin dil mein to dil se matlab teraa saudaa hi nahin sar mein to sar se kyaa kaam sarguzasht-e-dil-e-majruh likhi zaalim ko hijr mein ham ne liyaa khun-e-jigar se kyaa kaam jin ko hans hans ke rulaanaa hi faqat aataa ho un ke daaman ko mire dida-e-tar se kyaa kaam dil-e-naazuk na dhaDak jaae kisi kaa 'muztar' khuun jab ye ho to naalon ko asar se kyaa kaam"

"us ko huaa hai pyaar kaa aazaar kis tarah nargis chaman mein ho gai bimaar kis tarah dil par karam kare nigah-e-yaar kis tarah bimaar se ho pursish-e-bimaar kis tarah aankhein hain kor jalva-e-jaanaan nazaara-soz niklegi dil se hasrat-e-didaar kis tarah marnaa thaa sahl paas-e-vafaa se na mar sakaa itni si baat ho gai dushvaar kis tarah dil mein bandhaa tasavvur-e-zulf-e-daraaz-e-yaar zanjir ho gai hai giraftaar kis tarah ai aah-e-garm teri to shokhi nahin hai ye kumhlaa gae hain phuul se rukhsaar kis tarah itnaa koi khudaa ke liye aa ke dekh le dam toDtaa hai 'muztar'-e-bimaar kis tarah"

"dil kar rahaa hai kyon nigah-e-yaar ki talaash bimaar ko bhi hoti hai bimaar ki talaash ab tiir ki talaash na talvaar ki talaash dil ko faqat hai abru-e-khamdaar ki talaash jalve ko phir hai madd-e-nazar imtihaan-e-hosh phir tuur ko hai taalib-e-didaar ki talaash tere khayaal tere tasavvur ke saamne bimaar-e-ishq ko nahin gham-khvaar ki talaash chhaaegi hashr mein jo ghaTaa lutf-e-aam ki rahmat karegi khud hi gunahgaar ki talaash talvon ko mere dasht-navardi ki aarzu aur aablon ko vaadi-e-pur-khaar ki talaash 'muztar' kisi ki dil hi mein karni thi justuju dair-o-haram mein aap ne bekaar ki talaash"

"ho gayaa jis din se apnaa dil udaas ho gai duniyaa ki har mahfil udaas daagh-haa-e-yaas se hai dil udaas sham-e-mahfil se hui mahfil udaas marne vaale jitne the kyaa mar gae phir rahaa hai aaj kyon qaatil udaas dast-e-qaatil mein hinaa hai khuun nahin is liye hai shokhi-e-qaatil udaas pher li kis ne mohabbat ki nigaah ho rahaa hai kyon hamaaraa dil udaas vaqt-e-aakhir kyon na ho afsurdagi subh ko ho jaati hai mahfil udaas bekasi gor-e-gharibaan ki na puchh uf hai kaTti aakhiri manzil udaas aaegaa haan vo sitamgar aaegaa ho na itnaa 'muztar'-e-be-dil udaas"

"tu zamaane ki jaan hai ki nahin tujh pe martaa jahaan hai ki nahin dil bhi dein jaan bhi nisaar karein ye kaDaa imtihaan hai ki nahin zaahid un ke niyaaz-mandon mein be-niyaazi ki shaan hai ki nahin gaaliyaan aap ki sunun kab tak mere munh mein zabaan hai ki nahin aglaa vaada vo aglaa qaul-o-qaraar yaad kuchh mehrbaan hai ki nahin kaun de jaan in hasinon par jaan hai to jahaan hai ki nahin dil churaayaa hai tum ne 'muztar' kaa sach hamaaraa gumaan hai ki nahin"

"dil-rubaa tujh saa dusraa na huaa ai hasin tu magar khudaa na huaa jo mohabbat mein mubtalaa na huaa dard-e-dil se vo aashnaa na huaa meri miTTi vahaan pahunch jaati tujh se itnaa bhi ai sabaa na huaa roz aate hain vo ayaadat ko main na achchhaa huaa buraa na huaa tu hamesha judaa rahaa mujh se teraa armaan kabhi judaa na huaa apni rusvaai un ki badnaami is mohabbat mein haae kyaa na huaa bevafaai ki had hai ye 'muztar' rah ke pahlu mein dil miraa na huaa"

"gale mein taar-e-garebaan hain haar ki surat banaa huaa huun saraapaa bahaar ki surat azal se ai dil-e-betaab tere sadqe mein nazar na aaj tak aai qaraar ki surat tum apne tiir ko rahne do mere siine mein ki ik shahid ki hai yaadgaar ki surat lagaa hai mar ke mujhe daagh bevafaai kaa mili hai khaak mein kyaa eatibaar ki surat vo chupke rote hain aa aa ke raat ko aksar mire mazaar pe sham-e-mazaar ki surat ye iztiraab ki har zarra khaak kaa apni taDap rahaa hai dil-e-be-qaraar ki surat maaal-e-hasti-e-baatil ki khinch gai tasvir jo dekhi ek shikasta mazaar ki surat hujum-e-yaas ne kyaa sard kar diyaa dil ko bujhaa huaa hai charaagh-e-mazaar ki surat farogh-e-bazm-e-mohabbat hai ik tire dam se kahaan chalaa dil-e-'muztar' qaraar ki surat"

"raat uThi dil se yuun fughaan dilkash jaise kaaba ki ho azaan dilkash un ke kuche kaa hai samaan dilkash vo zamin dilkash aasmaan dilkash dil-shikan vaqt un ke jaane kaa aamad aamad kaa vo samaan dilkash aap ki baatein dil-fareb to hain na sahi meri daastaan dilkash lutf-e-tark-e-taalluqaat na puchh hai makaan se bhi laa-makaan dil-kash husn kaa jis mein zikr ho 'muztar' kyon na ho phir vo daastaan dil-kash"

"ro rahaa huun main ki naqd-e-dil gayaa vo ye khush hain ik khazaana mil gayaa yaad un ki aa gai jab dil gayaa ik na ik hamdard mujh ko mil gayaa shauq mein taaqat to dekho zoaf ki baiThe baiThe main kai manzil gayaa kah gayaa koi ye meri qabr par bevafaa huron se jaa kar mil gayaa paa-e-rangin chumne ke shauq mein khuun ho kar dil hinaa mein mil gayaa aah ki aur un ke dil mein raah ki ik qadam chal kar kai manzil gayaa ek parda paD gayaa mahmil pe aur jab ghubaar-e-qais taa-mahmil gayaa dil liyaa to dard kyon rahne diyaa itnaa puchhungaa agar vo mil gayaa puchhtaa hai koi dil par rakh ke haath kahiye ab to iztiraab-e-dil gayaa aap to aaraam se sote rahe aur yahaan naalon se aalam hil gayaa uf nigaah-e-yaas kaa 'muztar' asar duur tak rotaa huaa qaatil gayaa"

"dil vo dil jo bane khazaana-e-ishq lab vo lab jis pe ho fasaana-e-ishq dard-angez hai taraana-e-ishq kyaa junun-khez hai fasaana-e-ishq aah be-saakhta nikal aai yaad aaya jahaan zamaana-e-ishq nazar aaya jahaan vo naqsh-e-qadam jhuk gae paDh liyaa dogaana-e-ishq zulf-e-khubaan sanvaarne ke liye allah allaah banaa hai shaana-e-ishq husn ki zulf bikhri hi rahti nahin bantaa kahin jo shaana-e-ishq bahr-e-tambih-e-aashiq-e-be-khud yaad-e-gesu hai taaziyaana-e-ishq ai papihaa tujhe hai kis ki dhun tere lab par hai kyon taraana-e-ishq tiir vo tiir jis ko vo pheinkein dil vo dil jo bane nishaana-e-ishq tum ghazal mein likhaa karo 'muztar' qissa-e-husn yaa fasaana-e-ishq"

"un ki surat nazar nahin aati niind ai chashm-e-tar nahin aati kam huaa jaa rahaa hai zauq-e-junun fasl-e-gul ki khabar nahin aati nazar aataa hai rang ashkon mein choT dil ki nazar nahin aati kyaa khafaa ho gai tajalli-e-dost ab kabhi tuur par nahin aati aisi qismat kahaan ki jaam aataa bu-e-mai bhi idhar nahin aati jis mein rahtaa thaa intizaar un kaa ab vo shaam-o-sahar nahin aati kyon phir itraa rahi hai baad-e-bahaar us gali se agar nahin aati vo hansi phir rahi hai aankhon mein aankh kyon apni bhar nahin aati haae kis kaam ki hai tu ai maut kaam jab vaqt par nahin aati apne qaabu mein ye tabiat bhi ab to do-do pahar nahin aati khat kaa aataa javaab kyaa 'muztar' khabar-e-naama-bar nahin aati"

"aisi aankhein tu ne diin ai husn-e-jaanaana mujhe zarra zarra ab nazar aataa hai but-khaana mujhe qulqul-e-minaa ki surat aa rahi hain hichkiyaan yaad karte honge shaayad ahl-e-mai-khaana mujhe ro diyaa main aa gai apne shikasta dil ki yaad mil gayaa TuuTaa huaa ik din jo paimaana mujhe mukhtasar itni si hai rudaad bazm-e-husn ki shama un kaa naam hai kahte hain parvaana mujhe al-madad ai jazb-e-kaamil al-madad ai khizr-e-shauq kheinchtaa hai raah-e-kaaba mein bhi but-khaana mujhe soch kar anjaam-e-ulfat ho gayaa dil chuur chuur lailaa-o-majnun kaa yaad aayaa jo afsaana mujhe tere qaatil kai liye ghar ki hui jab justuju dard ne uTh kar dikhaayaa apnaa kaashaana mujhe us ki dhun se mujh ko matlab us ki dhun se mujh ko kaam koi matvaalaa kahe 'muztar' ki divaane mujhe"

"ab vo zauq-e-tasavvuraat nahin haae vo din nahin vo raat nahin un ki tegh-e-adaa pe mar miTnaa aur kuchh maani-e-hayaat nahin haal-e-dil puchhte hain hans hans kar be-sabab to ye iltifaat nahin phir hai kyaa chiiz kaaenaat agar jalva-haa-e-tasavvuraat nahin hai tasavvur mein gesu-e-shab-gun khatm hone ki aaj raat nahin aisi naaseh koi kitaab bhi hai husn-o-ulfat ki jis mein baat nahin"

"kuchh hansi-khel chaah hoti hai sakht mushkil nibaah hoti hai jis pe kaafir nigaah hoti hai us ki duniyaa tabaah hoti hai shokh kitni nigaah hoti hai le ke dil uzr-khvaah hoti hai husn-e-khaana-kharaab yaad rahe dil ki basti tabaah hoti hai jis se hoti hai sharh-e-soz-e-jigar mukhtasar si ik aah hoti hai dil-e-pur-shauq dekh kar bole aisi basti bhi vaah hoti hai ham ko bhi ai nasim ai shabnam hasrat-e-ashk-o-aah hoti hai jis se hoti hai chashm-e-dil raushan vo tiri gard-e-raah hoti hai haan dil-e-be-qaraar ki qimat husn ki ik nigaah hoti hai tai jo hoti hai tegh-e-qaatil se vahi jannat ki raah hoti hai ishq mein jaan di hai 'muztar' ne har taraf vaah-vaah hoti hai"

"hai ye mearaaj-e-fanaa sokhta-saamaanon ki ruhein lipTi hui hain shama se parvaanon ki aandhiyon ki hai kami koi na tufaanon ki ai junun puchh na vahshat ke bayaabaanon ki kaaenaat itni hi thi aap ke divaanon ki dhajjiyaan marne pe kuchh niklin garebaanon ki dard-mandaan-e-mohabbat jise dil kahte hain ek ujDi hui basti hai vo armaanon ki aable paanv ke jangal mein hue sina-sipar raah kaanTon ne jo roki tire divaanon ki tir-o-paikaan ki hui khun-e-jigar se daavat phir bhi khaatir mein kami rah gai mehmaanon ki husn ke dam se hai duniyaa-e-mohabbat aabaad shama kahte hain jise jaan hai parvaanon ki kah rahi hain ye marizaan-e-junun ki nabzein beDiyaan Dhili hui jaati hain divaanon ki raT zabaan ko hai tire naam ki allaah allaah zikr teraa hi sunein fikr ye hai kaanon ki us ki surat kaa tasavvur nahin jis ki surat kitni divaani tamannaaein hain divaanon ki kuchh sharar aahon ke hain raakh mein dil ke pinhaan yahi duniyaa hai tire sokhta-saamaanon ki apnaa siina hai ki hai ganj-e-shahidaan 'muztar' ek duniyaa yahin madfun hai armaanon ki"

"ye kahaa us ne mire shauq ke afsaane par be-adab shama kahin girti hai parvaane par aan dilvaate ho rakh rakh ke jo parvaane par choT aae na kahin zabt ke paimaane par un se kah de koi vo aa ke tamaashaa dekhein phuul barsaate hain log aap ke divaane par muD ke rahmat ki taraf ki jo nazar maston ne aa gayaa abr-e-siyah jhuum ke mai-khaane par yaad TuuTaa huaa dil aa gayaa pahron roe paD gai aankh jo TuuTe hue paimaane par khinch gai subh-e-qayaamat ki mujassam tasvir aa gayaa Dhal ke dupaTTaa jo kabhi shaane par yaad aaya koi naakaam-e-tamannaa 'muztar' ro diye aaj vo kyon qais ke afsaane par"