Ghazal

"jab dard mohabbat kaa mire paas nahin thaa main kaun huun kyaa huun mujhe ehsaas nahin thaa TuuTaa miraa har khvaab huaa jab se judaa vo itnaa to kabhi dil miraa be-aas nahin thaa aayaa jo mire paas mire honT bhigone vo ret kaa dariyaa thaa miri pyaas nahin thaa baiThaa huun main tanhaai ko siine se lagaa ke is haal mein jiinaa to mujhe raas nahin thaa kab jaan sakaa dard miraa dekhne vaalaa chehra mire haalaat kaa akkaas nahin thaa kyuun zahr banaa us kaa tabassum mere haq mein ai 'naqsh' vo ik dost thaa almaas nahin thaa"

"vo aaegaa dil se duaa to karo namaaz-e-mohabbat adaa to karo milegaa koi ban ke unvaan bhi kahaani ki tum ibtidaa to karo samajhne lagoge nazar ki zabaan mohabbat se dil aashnaa to karo tumhein maar Daaleingi tanhaaiyaan hamein apne dil se judaa to karo tumhaare karam se hai ye zindagi main bujh jaaungaa tum havaa to karo hazaaron manaazir nigaahon mein hain rukoge kahaan faisla to karo pukaare tumhein kucha-e-aarzu kabhi 'naqsh' dil kaa kahaa to karo"

"apnaa daaman dekh kar ghabraa gae khuun ke chhinTe kahaan tak aa gae bhuul thi apni kisi qaatil ko ham devtaa samjhe the dhoka khaa gae har-qadam par saath hain rusvaaiyaan ham to apne aap se sharmaa gae ham chale the un ke aansu ponchhne apni aankhon mein bhi aansu aa gae saath un ke meri duniyaa bhi gai aah vo duniyaa se meri kyaa gae 'naqsh' koi ham bhi jaaein chhoD kar jaise 'mir'-o-'ghaalib'-o-'saudaa' gae"

"tamaam-umr chalaa huun magar chalaa na gayaa tiri gali ki taraf koi raasta na gayaa tire khayaal ne pahnaa shafaq kaa pairaahan miri nigaah se rangon kaa silsila na gayaa baDaa ajiib hai afsaana-e-mohabbat bhi zabaan se kyaa ye nigaahon se bhi kahaa na gayaa ubhar rahe hain fazaaon mein subh ke aasaar ye aur baat mire dil kaa Dubnaa na gayaa khule darichon se aayaa na ek jhonkaa bhi ghuTan baDhi to havaaon se dostaana gayaa kisi ke hijr se aage baDhi na umr miri vo raat biit gai 'naqsh' ratjagaa na gayaa"

"main duniyaa ki haqiqat jaantaa huun kise milti hai shohrat jaantaa huun miri pahchaan hai she'r-o-sukhan se main apni qadr-o-qimat jaantaa huun teri yaadein hain shab-bedaariyaan hain hai aankhon ko shikaayat jaantaa huun main rusvaa ho gayaa huun shahr-bhar mein magar kis ki badaulat jaantaa huun ghazal phulon si dil sahraaon jaisaa main ahl-e-fan ki haalat jaantaa huun taDap kar aur taDpaaegi mujh ko shab-e-gham teri fitrat jaantaa huun sahar hone ko hai aisaa lage hai main suraj ki siyaasat jaantaa huun diyaa hai 'naqsh' jo gham zindagi ne use main apni daulat jaantaa huun"

"ek aansu giraa sochte sochte yaad kyaa aa gayaa sochte sochte kaun thaa kyaa thaa vo yaad aataa nahin yaad aa jaaegaa sochte sochte jaise tasvir laTki ho divaar se haal ye ho gayaa sochte sochte sochne ke liye koi rasta nahin main kahaan aa gayaa sochte sochte main bhi rasman taalluq nibhaataa rahaa vo bhi aksar milaa sochte sochte faisle ke liye ek pal thaa bahut ek mausam gayaa sochte sochte 'naqsh' ko fikr raatein jagaati rahin aaj vo so gayaa sochte sochte"

"tujh ko sochaa to kho gaiin aankhein dil kaa aaina ho gaiin aankhein khat kaa paDhnaa bhi ho gayaa mushkil saaraa kaaghaz bhigo gaiin aankhein kitnaa gahraa hai ishq kaa dariyaa is ki tah mein Dubo gaiin aankhein koi jugnu nahin tasavvur kaa kitni viraan ho gaiin aankhein do dilon ko nazar ke dhaage se ik laDi mein piro gaiin aankhein raat kitni udaas baiThi hai chaand niklaa to so gaiin aankhein 'naqsh' aabaad kyaa hue sapne aur barbaad ho gaiin aankhein"

"palaT kar dekh lenaa jab sadaa dil ki sunaai de meri aavaaz mein shaayad miraa chehra dikhaai de mohabbat raushni kaa ek lamha hai magar chup hai kise sham-e-tamannaa de kise daagh-e-judaai de chubhein aankhon mein bhi aur ruuh mein bhi dard ki kirchein miraa dil is tarah toDo ke aaina badhaai de khanak uTThein na palkon par kahin jalte hue aansu tum itnaa yaad mat aao ke sannaaTaa duhaai de rahegaa ban ke binaai vo murjhaai si aankhon mein jo buDhe baap ke haathon mein mehnat ki kamaai de mire daaman ko vusat di hai tu ne dasht-o-dariyaa ki main khush huun dene vaale tu mujhe katraa ke raai de kisi ko makhmalin bistar pe bhi mushkil se niind aae kisi ko 'naqsh' dil kaa chain TuuTi chaarpaai de"

"maanaa tiri nazar mein tiraa pyaar ham nahin kaise kahein ki tere talabgaar ham nahin sinchaa thaa jis ko khun-e-tamannaa se raat-din gulshan mein us bahaar ke haqdaar ham nahin ham ne to apne naqsh-e-qadam bhi miTaa diye lo ab tumhaari raah mein divaar ham nahin ye bhi nahin ke uThti nahin ham pe ungliyaan ye bhi nahin ke saahab-e-kirdaar ham nahin kahte hain raah-e-ishq mein baDhte hue qadam ab tujh se duur manzil-e-dushvaar ham nahin jaanein musaafiraan-e-rah-e-aarzu hamein hain sang-e-mil raah ki divaar ham nahin pesh-e-jabin-e-ishq usi kaa hai naqsh-e-paa us ke sivaa kisi ke parastaar ham nahin"

"apni bhigi hui palkon pe sajaa lo mujh ko rishta-e-dard samajh kar hi nibhaa lo mujh ko chuum lete ho jise dekh ke tum aaina apne chehre kaa vahi aks banaa lo mujh ko main huun mahbub andheron kaa mujhe hairat hai kaise pahchaan liyaa tum ne ujaalo mujh ko chhaanv bhi dungaa davaaon ke bhi kaam aaungaa niim kaa paudaa huun aangan mein lagaa lo mujh ko doston shishe kaa saamaan samajh kar barson tum ne bartaa hai bahut ab to sambhaalo mujh ko gae suraj ki tarah lauT ke aa jaaungaa tum se main ruuTh gayaa huun to manaa lo mujh ko ek aaina huun ai 'naqsh' main patthar to nahin TuuT jaaungaa na is tarah uchhaalo mujh ko"

"bharosa kar liyaa jis par usi ne ham ko luuTaa hai kahaan tak naam ginvaaein sabhi ne ham ko luuTaa hai kabhi baDh kar hamaaraa raasta rokaa andheron ne kabhi manzil dikhaa kar raushni ne ham ko luuTaa hai jo luTte maut ke haathon to koi gham nahin hotaa sitam is baat kaa hai zindagi ne ham ko luuTaa hai hamaari bebasi par muskuraa kar dekhne vaalo tumhaare shahr ki ek ek gali ne ham ko luuTaa hai"