Ghazal

"zulm hai takht taaj sannaaTaa khauf qaanun raaj sannaaTaa guftugu tiir si lagi dil mein ab hai shaayad ilaaj sannaaTaa so gaiin yaadein bujh gai ummid ghar mein kitnaa hai aaj sannaaTaa log dil ki kahein to kaise kahein chaahtaa hai samaaj sannaaTaa apni aadat ki sab se sab kah dein shahr kaa hai mizaaj sannaaTaa"

"kyaa dikhaataa hai ye safar dekho ab kahaan rukti hai nazar dekho vaqt har aaine kaa dushman hai phir bhi kuchh roz ban-sanvar dekho khud ko gar dekho ghair aankhon se 'umr ne kyaa kiyaa asar dekho raat ke baa'd raat aaegi dil se jaataa hai kab ye Dar dekho aae bhi aur gae bhi khaali haath chhoDo duniyaa ko aur ghar dekho"

"ye tamannaa hai ki ab aur tamannaa na karein sher kahte rahein chup chaap taqaazaa na karein in badalte hue haalaat mein behtar hai yahi aaina dekhein to khud apne ko DhunDaa na karein tu gurezaan rahi ai zindagi ham se lekin kaise mumkin hai ki ham bhi tujhe chaahaa na karein is nae daur ke logon se ye kah de koi dil ke dukhDon kaa sar-e-aam tamaashaa na karein"

"dosti kuchh nahin ulfat kaa sila kuchh bhi nahin aaj duniyaa mein ba-juz zehn-e-rasaa kuchh bhi nahin patte sab gir gae peDon se magar kyaa kahiye aisaa lagtaa hai hamein jaise huaa kuchh bhi nahin kal ki yaadon ki jalaane ko jalaaein mishal ek taarik udaasi ke sivaa kuchh bhi nahin DhunDhnaa chhoD do parchhaain kaa maskan yaaro chaahe jis tarah jiyo is mein nayaa kuchh bhi nahin ik buroTas se shikaayat ho to dil dukhtaa hai ho jo har ek se shikva to gila kuchh bhi nahin"

"ham jo pahle kahin mile hote aur hi apne silsile hote phir har ik baat Thiik se hoti phir na uljhan na faasle hote phir na tanhaai raat ko Dasti phir na qismat se ye gile hote phir na lagtaa ye shahr ik sahraa phir na gum dil ke qaafile hote phir ghazal hoti sab zabaanon par phir kisi ke na lab sile hote phir har ik lamha gungunaa uThtaa phir har ik samt gul khile hote"

"kisi qismat mein ek ghar niklaa kisi taqdir mein safar niklaa zakhm se kuchh ghazal ke sher uge shaakh se phuuT kar samar niklaa dost ban kar vafaa na ki jis ne huaa dushman to mo'tabar niklaa nae aansu the aastin ke liye daaman-e-dil kabhi kaa tar niklaa jab ye maanaa ki dil mein Dar hai bahut tab kahin jaa ke dil se Dar niklaa"

"kaho to aaj bataa dein tumhein haqiqat bhi ki zindagi se rahi hai hamein mohabbat bhi tumhaaraa husn to hai jaan apne rishte ki barat rahe hain magar ham zaraa muravvat bhi hazaar chaahein magar chhuT hi nahin sakti baDi ajiib hai ye mai-kashi ki aadat bhi ye zindagi koi mahshar sahi magar yaaro sukun-bakhsh hai ham ko yahi qayaamat bhi udhaar le ke khushi saari umr jiite rahe magar ye ilm thaa aaegi ham pe aafat bhi"

"kaise ho kyaa hai haal mat puchho mujh se mushkil savaal mat puchho kis ne tum ko sataayaa hai itnaa kis liye hai malaal mat puchho kyuun vo khud ko nazar nahin aataa kyuun hai shishe mein baal mat puchho jabr kis kaa hai kaun hai majbur kis ne pheinkaa hai jaal mat puchho kaun meri khushi kaa dushman hai mujh se tum us kaa haal mat puchho"