us se puchho azaab raston kaa — Abbas Dana

tum aake lauT gae phir bhi ho yahin maujud
tumhaare jism ki khushbu mire makaan mein hai

is se baDh kar tiri yaadon ki karun kyaa taazim
teri yaadon mein zamaane ko bhulaa rakkhaa hai

taajjub kuchh nahin 'daanaa' jo baazaar-e-siyaasat mein
qalam bik jaaein to sach baat likhnaa chhoD dete hain

ghar ki viraaniyaan le jaae churaa kar koi
isi ummid pe darvaaza khulaa rakkhaa hai

apne hi khuun se is tarah adaavat mat kar
zinda rahnaa hai to saanson se baghaavat mat kar

hai jism sakht magar dil bahut hi naazuk hai
ki jaise aaina mahfuz ik chaTTaan mein hai

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

yuun to maujud apne ghar mein hai
aadmi mustaqil safar mein hai

safar mein aise kai marhale bhi aate hain
har ek moD pe kuchh log chhuT jaate hain

is baar raah-e-ishq kuchh itni tavil thi
us ke badan se ho ke guzarnaa paDaa mujhe

dil ke zakhmon ko sajaane kaa hunar rakhtaa huun
mustaqil main tiri yaadon kaa safar rakhtaa huun