tum aake lauT gae phir bhi ho yahin maujud — Abbas Dana

is se baDh kar tiri yaadon ki karun kyaa taazim
teri yaadon mein zamaane ko bhulaa rakkhaa hai

taajjub kuchh nahin 'daanaa' jo baazaar-e-siyaasat mein
qalam bik jaaein to sach baat likhnaa chhoD dete hain

ghar ki viraaniyaan le jaae churaa kar koi
isi ummid pe darvaaza khulaa rakkhaa hai

apne hi khuun se is tarah adaavat mat kar
zinda rahnaa hai to saanson se baghaavat mat kar

us se puchho azaab raston kaa
jis kaa saathi safar mein bichhDaa hai

hai jism sakht magar dil bahut hi naazuk hai
ki jaise aaina mahfuz ik chaTTaan mein hai

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

shor din ko nahin sone detaa
shab ko sannaaTaa jagaa detaa hai

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

koi tashbih kaa khurshid na talmih kaa chaand
sar-e-qirtaas lagaa harf-e-barhana achchhaa

andheri raat ki parchhaaiyon mein Duub gayaa
sahar ki khoj mein jo bhi ufuq ke paar gayaa

sitaara aankh mein dil mein gulaab kyaa rakhnaa
ki Dhalti umr mein rang-e-shabaab kyaa rakhnaa