aavaaz de rahaa hai akelaa khudaa mujhe — Abdur Rahim Nashtar

phir ik nae safar pe chalaa huun makaan se
koi pukaartaa hai mujhe aasmaan se

vo so rahaa hai khudaa duur aasmaanon mein
farishte loriyaan gaate hain us ke kaanon mein

main teri chaah mein jhuTaa havas mein sachchaa huun
buraa samajh le magar dusron se achchhaa huun

vo ajnabi tiri baanhon mein jo rahaa shab bhar
kise khabar ki vo din bhar kahaan rahaa hogaa

paan ke Thele hotel logon kaa jamghaT
apne tanhaa hone kaa ehsaas bhi kyaa

main bhi taalaab kaa Thahraa huaa paani thaa kabhi
ek patthar ne ravaan dhaar kiyaa hai mujh ko

chalaa hai chhoD ke tanhaa kidhar tasavvur-e-yaar
shab-e-firaaq mein thaa tujh se mashghala dil kaa

ik khilaunaa jogi se kho gayaa thaa bachpan mein
DhunDhtaa phiraa us ko vo nagar nagar tanhaa

tum baiThe ho lekin jaate dekh rahaa huun
main tanhaai ke din aate dekh rahaa huun

ye kis maqaam pe laai hai meri tanhaai
ki mujh se aaj koi bad-gumaan nahin hotaa

jis ko is fasl mein honaa hai baraabar kaa sharik
mere ehsaas mein tanhaaiyaan kyuun botaa hai

mujh ko thi mahfilon ki bahut aarzu magar
tanhaaiyon ke khauf se tanhaa rahaa huun main