yaad aate hain ve din bahut — Abdurrahman Momin

abhi se tujh ko paDi hai visaal ki miri jaan
abhi to hijr ne unvaan hi nahin paayaa

aaj suraj ne kah diyaa 'momin'
tu jalegaa to raushni hogi

ve saamne se jaa chukaa to ye khulaa
vo khvaab lag rahaa thaa khvaab thaa nahin

jaane kyaa kah rahaa thaa vo mujh se
main ne bhi kah diyaa ki khush huun main

khvaab mere churaa liye us ne
jis ko main ne udhaar diin aankhein

us ne vaada nahin liyaa mujh se
aur kahtaa hai main mukar rahaa huun

mere khvaabon ke jharokon ko sajaate rahiye
na sahi vasl magar yaad to aate rahiye

ai muzaffar kis liye bhopal yaad aane lagaa
kyaa samajhte the ki dilli mein na hogaa aasmaan

yaad aae tu mujh ko bahut jab shab kaTe jab pau phaTe
jab vaadiyon mein duur tak kohraa dikhe be-ant saa

dil dhaDakne kaa sabab zindagi ho sakti hai
ye zaruri to nahin hai ki tiri yaad hi ho

vaabasta meri yaad se kuchh talkhiyaan bhi thiin
achchhaa kiyaa ki mujh ko faraamosh kar diyaa

na to sayyaad kaa khaTkaa na khizaan kaa dhaDkaa
ham ko vo chain qafas mein hai ki bustaan mein nahin