mire hamraah garche duur tak logon ki raunaq hai — Adeem Hashmi

ik khilaunaa TuuT jaaegaa nayaa mil jaaegaa
main nahin to koi tujh ko dusraa mil jaaegaa

kaTi hui hai zamin koh se samundar tak
milaa hai ghaao ye dariyaa ko raasta de kar

kyuun parakhte ho savaalon se javaabon ko 'adim'
honT achchhe hon to samjho ki savaal achchhaa hai

huaa hai jo sadaa us ko nasibon kaa likhaa samjhaa
'adim' apne kiye par mujh ko pachhtaanaa nahin aataa

yaad kar ke aur bhi taklif hoti thi 'adim'
bhuul jaane ke sivaa ab koi bhi chaaraa na thaa

faasle aise bhi honge ye kabhi sochaa na thaa
saamne baiThaa thaa mere aur vo meraa na thaa

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

yuun to maujud apne ghar mein hai
aadmi mustaqil safar mein hai

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

safar mein aise kai marhale bhi aate hain
har ek moD pe kuchh log chhuT jaate hain

zamin ki god mein itnaa sukun thaa 'anjum'
ki jo gayaa vo safar ki thakaan bhuul gayaa

asaatiza ne miraa haath thaam rakkhaa hai
isi liye to main pahunchaa huun apni manzil par