huaa hai jo sadaa us ko nasibon kaa likhaa samjhaa — Adeem Hashmi

faasle aise bhi honge ye kabhi sochaa na thaa
saamne baiThaa thaa mere aur vo meraa na thaa

ik khilaunaa TuuT jaaegaa nayaa mil jaaegaa
main nahin to koi tujh ko dusraa mil jaaegaa

kaTi hui hai zamin koh se samundar tak
milaa hai ghaao ye dariyaa ko raasta de kar

kyuun parakhte ho savaalon se javaabon ko 'adim'
honT achchhe hon to samjho ki savaal achchhaa hai

yaad kar ke aur bhi taklif hoti thi 'adim'
bhuul jaane ke sivaa ab koi bhi chaaraa na thaa

mire hamraah garche duur tak logon ki raunaq hai
magar jaise koi kam hai kabhi milne chale aao

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

jaan dene ke sivaa aur bhi tadbir karun
varna ye baat to ham us se sadaa kahte hain

kal laD gayaa ki aur pe aashiq hai tu 'asad'
aayaa hai jab vo yaan to ik ilzaam de gayaa

jab yaad mein taDpein to mohabbat ko baDhaa dein
khud dard-e-mohabbat ki masihaai mohabbat