haalat pe meri un ke bhi aansu nikal paDe — Agha Shayar Qazalbash

pahle is mein ik adaa thi naaz thaa andaaz thaa
ruThnaa ab to tiri aadat mein shaamil ho gayaa

milnaa na milnaa ye to muqaddar ki baat hai
tum khush raho raho mire pyaare jahaan kahin

is liye kahte the dekhaa munh lagaane kaa maza
aaina ab aap kaa madd-e-muqaabil ho gayaa

baDe sidhe-saadhe baDe bhole-bhaale
koi dekhe is vaqt chehraa tumhaaraa

paamaal kar ke puchhte hain kis adaa se vo
is dil mein aag thi mire talve jhulas gae

abru na sanvaaraa karo kaT jaaegi ungli
naadaan ho talvaar se khelaa nahin karte

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

hans paDi shaam ki udaas fazaa
is tarah chaae ki pyaali hansi

dard-e-dil kyun-ki kahun main us se
har taraf log ghire baiThe hain

sadaa ham to khoe gae se rahe
kabhu aap mein tum ne paayaa hamein