ye kaun boltaa hai mire dil ke andarun — Ahmad Rizwan

ajnabi log hain main jin mein ghiraa rahtaa huun
aashnaa koi yahaan mere fasaane kaa nahin

mujhe ye kyaa paDi hai kaun meraa ham-safar hogaa
havaa ke saath gaataa huun nadi ke saath chaltaa huun

ek muddat se use dekh rahaa huun 'ahmad'
aur lagtaa hai abhi ek jhalak dekhaa hai

hotaa na koi kaar-e-zamaana mire supurd
bas apne kaarobaar-e-mohabbat ko dekhtaa

uDti hai khaak dil ke darichon ke aas-paas
shaayad makin koi nahin is makaan mein

kisi ko chhoD detaa huun kisi ke saath chaltaa huun
main chaltaa huun to phir vaabastagi ke saath chaltaa huun

main baDaa ho gayaa huun magar bachpanaa
mere dil se kabhi bhi gayaa hi nahin

'saif' andaaz-e-bayaan rang badal detaa hai
varna duniyaa mein koi baat nai baat nahin

aankh nam rukh par udaasi dard bhi dil ke qarib
kyaa mohabbat aa gai hai apni manzil ke qarib

dil thaamtaa ki chashm pe kartaa tiri nigaah
saaghar ko dekhtaa ki main shisha sambhaaltaa

kis nazar se aap ne dekhaa dil-e-majruh ko
zakhm jo kuchh bhar chale the phir havaa dene lage

ik ek harf ki rakhni hai aabru mujh ko
savaal dil kaa nahin hai miri zabaan kaa hai