'ishq mein koi bhi sarhad hamein manzur nahin — Ali Asar Bandvi

ehsaas-e-tishnagi na thaa sahraa mein kuchh magar
lab khushk ho rahe hain samundar ko dekh kar

hijr kaa maaraa huun Table par yahi sab paaoge
adh-likhe khat bikhraa album aur khaali botalein

jin ke daaman mein mere khuun ke chhinTe the 'asar'
ab vo shaffaaf libaason mein nazar aate hain

us be-khabar ki niind kaa 'aalam na puchhiye
takiya kahin hai zulf kahin aur kahin badan

talkhi ke saath kiije na tark-e-ta'alluqaat
chubhtaa rahegaa varna ye lahja tamaam 'umr

jo pahle aankh se ojhal huaa thaa
vo ab dil se bhi rukhsat ho rahaa hai

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

mohabbat mar gai 'mushtaaq' lekin tum na maanoge
main ye afvaah bhi tum ko sunaa kar dekh letaa huun

ab shughl hai yahi dil-e-izaa-pasand kaa
jo zakhm bhar gayaa hai nishaan us kaa dekhnaa

tum ko aataa hai pyaar par ghussa
mujh ko ghusse pe pyaar aataa hai

main sab kaa sab mohabbat ke liye huun
so laa-mahdud muddat ke liye huun