khvaab bikhreinge to ham ko bhi bikharnaa hogaa — Anwar Minai

har dam duaa-e-aab-o-havaa maangte rahe
nange darakht sabz qabaa maangte rahe

divaangi ki aisi milegi kahaan misaal
kaanTe khaaridtaa huun gulaabon ke shahr mein

is ahd mein rishton ki be-rang dukaanon mein
hiire se bhi mahngaa hai vishvaas kaa aaina

laakh suraj ki inaayaat rahein mere saath
meraa saaya na mire qad ke baraabar phailaa

utraa thaa meri ruuh ke rauzan se jo kabhi
ghuT ghuT ke mere jism mein marne lagaa hai vo

jab zamin ke muqaddar sanvar jaaeinge
aasmaan se farishte utar aaeinge

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

shor din ko nahin sone detaa
shab ko sannaaTaa jagaa detaa hai

charaagh ki thartharaati lau mein har os qatre mein har kiran mein
tumhaari aankhein kahaan nahin thiin tumhaaraa chehra kahaan nahin thaa

shaam bhi hai subh bhi hai aur din bhi raat bhi
maah-e-taabaan ab bhi hai mahr-e-darakhshaan ab bhi hai

baDe armaan se niklaa thaa shopping ke liye ghar se
closing pe har ik baazaar thaa kal shab jahaan main thaa