shaam hoti hai to lagtaa hai koi ruuTh gayaa — Ashfaq Nasir

jaa tujhe tere havaale kar diyaa
kheinch le ye haath phailaayaa huaa

shaam Dhalne se faqat shaam nahin Dhalti hai
umr Dhal jaati hai jaldi palaT aanaa mire dost

apni qismat mein sabhi kuchh thaa magar phuul na the
tum agar phuul na hote to hamaare hote

hijr insaan ke khad-o-khaal badal detaa hai
kabhi fursat mein mujhe dekhne aanaa mire dost

vo shakhs jis ki khushi kaa baais thiin meri baatein
use ab un par malaal karne bhi aa gae hain

ham aaine mein tiraa aks dekhne ke liye
kai charaagh nadi mein bahaane lagte hain

shor din ko nahin sone detaa
shab ko sannaaTaa jagaa detaa hai

charaagh ki thartharaati lau mein har os qatre mein har kiran mein
tumhaari aankhein kahaan nahin thiin tumhaaraa chehra kahaan nahin thaa

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

arsa-e-zulmat-e-hayaat kaTe
ham-nafas muskuraa ki raat kaTe

furqat ki shab mein aaj ki phir kyaa jalaaveinge
dil kaa diyaa thaa ek so kal hi jalaa diyaa