vo phuul ho sitaara ho shabnam ho jhiil ho — Ashfaq Nasir

jaa tujhe tere havaale kar diyaa
kheinch le ye haath phailaayaa huaa

shaam Dhalne se faqat shaam nahin Dhalti hai
umr Dhal jaati hai jaldi palaT aanaa mire dost

apni qismat mein sabhi kuchh thaa magar phuul na the
tum agar phuul na hote to hamaare hote

shaam hoti hai to lagtaa hai koi ruuTh gayaa
aur shab us ko manaane mein guzar jaati hai

hijr insaan ke khad-o-khaal badal detaa hai
kabhi fursat mein mujhe dekhne aanaa mire dost

vo shakhs jis ki khushi kaa baais thiin meri baatein
use ab un par malaal karne bhi aa gae hain

shor din ko nahin sone detaa
shab ko sannaaTaa jagaa detaa hai

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

garmi bahut hai aaj khulaa rakh makaan ko
us ki gali se raat ko purvaai aaegi

is bhare shahr mein din raat Thaharte hi nahin
kaun yaadon ke safar-naame ko tahrir kare

shab ki divaar giri to dekhaa
nok-e-nashtar hai sahar kuchh bhi nahin