kaanTe se bhi nichoD li ghairon ne bu-e-gul — Aslam Kolsarii

'aslam' baDe vaqaar se degrē vasul ki
aur is ke baa'd shahr mein khvaancha lagaa liyaa

shahr mein aa kar paDhne vaale bhuul gae
kis ki maan ne kitnaa zevar bechaa thaa

eid kaa din hai so kamre mein paDaa huun 'aslam'
apne darvaaze ko baahar se muqaffal kar ke

hamaari jiit hui hai ki donon haare hain
bichhaD ke ham ne kai raat din guzaare hain

qarib aa ke bhi ik shakhs ho sakaa na miraa
yahi hai meri haqiqat yahi fasaana miraa

jab main us ke gaanv se baahar niklaa thaa
har raste ne meraa rasta rokaa thaa

jab ki pahlu se yaar uThtaa hai
dard be-ikhtiyaar uThtaa hai

phuul khulte hi titli bhi aai
kyaa koi dosti puraani hai

ab mujh ko rukhsat honaa hai ab meraa haar-singhaar karo
kyuun der lagaati ho sakhiyo jaldi se mujhe tayyaar karo

jo yaad-e-yaar se guft-o-shunid kar li hai
to goyaa phuul se khushbu kashid kar li hai

kahne ko gham-e-hijr baDaa dushman-e-jaan hai
par dost bhi is dost se behtar nahin miltaa

ab khulaa khvaab mein kuchh khvaab milaataa thaa main
khaak uDaataa thaa main sayyaaron ki sayyaaron par