eid kaa din hai so kamre mein paDaa huun 'aslam' — Aslam Kolsarii

'aslam' baDe vaqaar se degrē vasul ki
aur is ke baa'd shahr mein khvaancha lagaa liyaa

kaanTe se bhi nichoD li ghairon ne bu-e-gul
yaaron ne bu-e-gul se bhi kaanTaa banaa diyaa

shahr mein aa kar paDhne vaale bhuul gae
kis ki maan ne kitnaa zevar bechaa thaa

hamaari jiit hui hai ki donon haare hain
bichhaD ke ham ne kai raat din guzaare hain

qarib aa ke bhi ik shakhs ho sakaa na miraa
yahi hai meri haqiqat yahi fasaana miraa

jab main us ke gaanv se baahar niklaa thaa
har raste ne meraa rasta rokaa thaa

itne mein aur charkh ne miTTi palid ki
bachche ne muskuraa ke khabar di jo iid ki

haalaat 'shahaab' aankh uThaane nahin dete
bachchon ko magar iid manaane ki paDi hai

jab aayaa iid kaa din ghar mein bebasi ki tarah
to mere phuul se bachchon ne mujh ko gher liyaa

eid kaa chaand jo dekhaa to tamannaa lipTi
un se taqrib-e-mulaaqaat kaa rishta niklaa

mujh ko to iid mein bhi faraaghat kahaan mili
laDti rahi hai saas savere se shaam tak

ham se bichhDe hain kai log hamaare apne
ham ne har 'iid pe qurbaan kiyaa hai kuchh kuchh